Grand Master Sir Chaco Cornelio un biaha mas a contribui cu su conocimentonan di tur e reglamentonan di referee na Quito, Ecuador. Un grupo di 40 referee nacional di Ecuador a sigui e curso duna door di Grand Master Sir Chaco Cornelio di dia 25 pa 29 di october den Centro Deportivo Pichincha na Quito. Despues di representa Aruba grandemente na e di 3 Grand Prix na London, Grand Master Sir Chaco Cornelio a haci un biahe relampago pa Ecuador pa duna e curso na 40 referee nacional di Ecuador. Tur e cambionan di reglamento cu tabata tin na London a wordo splica y entrena door di e refereenan aki. Grand Master Chuong Pham di Washington tabata tey como ayudante di Grand Master Sir Chaco Cornelio na Ecuador. E refereenan a train tur e movimentonan practico di signalisacion y tambe por a mira videonan di entrenamento di referee. Durante e estadia di Grand Master Sir Chaco Cornelio na Quito el a haña e oportunidad di bishita e awanan Termal na Papallacta cu ta 4000 meter ariba nivel di awa y tambe e Tempel di Solo.
Noord Taekwondo Center ta hopi contento cu Grand Master Sir Chaco Cornelio cu su logronan.
