Diferente departamento di gobierno ta den un of otro edificio cu nan ta huur of ta forma parti di e huur-koop cu SOGA (Stichting Onroerendgoed Aruba). Loke por a constata ta cu hopi di e edificionan aki tin hopi aña para bandona.
Tabata recientemente cu e parlamentario di fraccion Accion21 Miguel Mansur cu a haci algun pregunta na e minister encarga cu infrastructura. Den e caso aki ta trata di e propio Prome Minister mr. Evelyn Wever Croes.
A haci e preguntanan aki na e mandatario dia 7 di maart ultimo unda ta puntra cuanto edificio di gobierno tin cu ta bandona, o sea cu ta den uzo, cuanto tempo y si no tin interes pa benta di e edificionan aki.
Prome minister a informa Mansur, via di contesta por escrito, cu na e momentonan aki gobierno tin casi 20 edificio bashi. Pa ta mas specifico 17.
Loke ta hala atencion ta cu tur e 17 edificionan aki ta wordo cataloga di ta den un situacion malisimo y cu no tin placa pa drecha nan. Pa cinco di e edificionan aki no tin un taxatierapport disponibel. Den e restonan por tuma nota cu e ex-edificio di DOW, cu Aruba Ports Authority (APA) ta interesa den dje, tin un balor di un poco mas cu 7 miyon florin.
Esaki ta esun cu balor mas halto den e 17 edificionan bandona. E otronan ta ex-edificio Duana 3.3 miyon; ministerio publico 3.3 miyon; KPA 4.8 miyon florin; BGD 2.7 miyon y GNC 1.6 miyon florin. Pues tur e edificionan aki hunto ta rond di 23 miyon florin cu gobierno tin na edificio bandona, kapitaal vernietiging. Y cu transcurso di tempo lo perde su balor mirando e estado den cual nan ta. E otronan cu tin un balor poni ta menos di un miyon florin. Ta papia aki di otro seis edificio y cu na final por nifica en total 30 miyon florin of mas.
E lista entrega of manda pa parlamentario Mansur ta mustra tambe cu 16 di e 17 edificionan aki tin mas cu 10 aña bandona, hera casi 20 aña. E edificionan aki ta pa menciona algun: e flat di polisnan soltero na San Nicolas; ex-Inspectie I&A den Zona Liber na Bushiri; ex-HBK Noord y Santa Cruz; ex_DOW; Ex_BGD; ex_Huis van Bewaring; Ex-Warda di Polis Playa; ex-edificio di Polis na Savaneta; ex-Ministerio Publico; edificio bieu di Deurwaarder; ex-Duana; ex-edificio di dokternan di cas na Santa Cruz; ex-station di gasolin (band’i Lagoen); e misa den Sero Colorado; ex-Mo Chimi Plaza Status Aparte Betico Croes y ex-cas di mayornan di Betico Croes tambe na Santa Cruz.
Tres di e edificionan aki ta riba 1000M2, di cual esun mas grandi ta ex-edificio di Warda di Polis cu ta riba 3 mil m2.
Pero segun e mandatario ta bisa tambe, cu tin interes den por lo menos seis di e edificionan aki. Un di nan ta pa e edificio den Havenstraat cu tabata sede di Ministerio Publico. Ta den negociacion cu FCCA pa cumpr’e cu e meta pa crea un compleho di apartamento. APA ta interesa den esun unda DOW tabata situa na Playa y ta basta avansa pa yega na e parti di traspaso. E edificio bieu di Ward’i Polis na Playa tin interes pa crea eynan un Boutique Hotel.
Algo cu mayoria di pueblo no ta di acuerdo pasobra nan no kier mira ni hotel grandi ni chikito mas. Ya caba tin un cantidad grandi di cas a bira AIRBNB y no tin mucho aprecio pa mas luga di hospedahe. E edificio bieu di Polis na Savaneta cu ta den renobacion bou guia di Stichting Monumentenfonds y e mesun KPA mes ta interesa den dje. Den e caso di e edificio bieu di Duana, gobierno ta tratando pa haya un edificio nobo a cambio di esaki.
Pa loke ta e misa den Sero Colorado a bisa cu ta “den negociacion” pero no a menciona cu cual grupo. E edificio di cas di mayornan di Betico Croes, ta pendiente “bruikleen” cu Fundacion Museo Betico Croes.
