Parlamentario independiente, mr. dr. Ryçond do Nascimento a declara recientemente cu parlamentario independiente Gerlien Croes a gaña pueblo henter relaciona cu tema di ley di Strafvordering, cu segun ley vigente e detenido ta pasa den un cel na Warda di Polis maximo dies dia. Parlamentario do Nascimento, cu tambe a ‘bula’fo’ di partido AVP hunto cu Gerlien Croes, ta tild’e di a haya su titulo di ‘meester’ den cahita di ‘cracker jack.’ Banda di esaki, parlamentario Croes a laga sa cu pronto lo anuncia kico ta su ‘next move’ den loke ta su trayectorio politico, si lo bay den un partido nobo of existente, entre otro.
Riba e declaracionnan di colega parlamentario do Nascimento, parlamentario Croes na su banda ta splica cu como politico bo tin derecho y tur libertad di mundo pa haci expresionnan y cualkier ciudadano tin esaki, anto cu esey ta retorica politico di do Nascimento.
“Mi ta respeta esey, si e tin cambionan di pensamento despues di un aña cu nos tabata hunto den un lucha pa cambio di ex-partido, si aworaki e no ta den liña of haya su mes mas den principio di norma y balor cu nos ta para p’e hunto, esey ta cambionan di dje.” Croes ta expresa cu su persona ta sigui su trayectorio politico manera a bin ta haci desde 2017 cu a inicia su carera politico na Aruba.
NO TA HINCA ENERGIA DEN ATAKE POLITICO
“Nada no a cambia, mesun norma y balor y principio ta keda vigente pa mi persona, y den e mesun lucha mi ta continua.” Aruba tin hopi reto den diferente aspecto, desaroyo di turismo hotelero, reto economico y mas, dus enfasis mester bay awor riba loke Aruba tin mester. Parlamentario Croes ta bisa cu e no ta hinca energia den negativismo of atake politico contra otro colega parlamentario. “Pa mi aworaki Aruba ta na prome luga.”
E anuncio di Gerlien Croes pa loke ta su siguiente paso den su trayectorio politico ta bini pronto – mirando cu eleccion ta na caminda – y Croes ta kere cu na su debido momento e lo comparti cu comunidad kico lo bay sosode. Croes ta comprometi cu pueblo pa loke ta continuacion como politico na Aruba, si ta un lista nobo of existente esey lo bira parti di e anuncio pronto.
