E hecho cu awe gobierno di Aruba ta reacciona babuca pa e acusacionnan contra parlamentario Rocco Tjon no ta convincente. Awe a sali prueba di un carta cu abogado mr. Rossi Marchena a manda pa Gobernador di Aruba y na Minister Andin Bikker den cual a conta henter e asunto rond di e persecucion politico contra recherche Paola Kock. Den e carta di 14 pagina, e abogado a conta gobierno tur cos, den nomber di su cliente. Ta for di e dia ey gobierno y Minister Presidente tabata sa cu e top di polis ta corumpi, tin weganan amoroso tumando luga y cu ta persigui tur polis cu para den “nan” caminda.
E carta a bini despues cu altocomisario di polis a manda un proposicion pa castiga e polis, despues di un supuesto investigacion interno contra dje. Den su defensa, e polis a splica Gobernador y gobierno “na placa chikito” kico ta pasando den Cuerpo Policial y con e top ta persigui tur polis cu no ta sigui e wega. Den e carta, cu a bay Corte tambe den e caso, ta menciona nomber di ex-altocomisario cu lo tabatin relacion amoroso cu otro polis y a conta adelanta caba cu ta tap celular di Paul Croes pasobra tin un investigacion contra dje. Tambe a lesa partinan den e carta unda ta acusa e actual altocomisario di ta persigui polis basa riba jaloezie cu si tabatin relacion amoroso cu un ex di dje, cu ta un altoinspector di polis.
E berguensa den e caso aki ta, cu despues di lesa henter e defensa di e polis envolvi, ta realisa cu ta hopi wega amoroso (taba)tin den top di nos Cuerpo di Polis. E ta mustra un otro cara cu kisas hopi polis ta consciente di dje pero cu comunidad aki ‘fo no tin un idea di e asunto aki.
Na final, e asunto aki ta sirbi como un contesta riba varios pregunta cu a keda habri den henter e investigacion cu tabatin rond di acusacion contra ex-altoinspector Rocco Tjon. Si mira cu desde tempo cu e recherche Kock a traha un rapport basa riba locual el a scucha e yiu di e parlamentario conta di kico e tata lo a haci cu ne, mesora el a bira enemigo di e “kliek”. A busca tur forma pa purba kit’e di trabou y e minimo chens cu a pensa cu a haya, a core mand’e su retiro, pero hues a destrui e decision di altocomisario Tjon-Kock den e caso aki.
Cu si Corte ta haya cu e asunto aki ta persecucion amoroso, no ta parece den e sentencia. Pero cu hues no a tene cuenta cu ningun di e supuesto puntonan cu mando policial a bin pa core cu un “enemy of the police chiefs”, ta laga tur hende pensa. Kisas Corte ta mandando un señal pa gobierno, lesa Minister Andin Bikker, cu e tin pa haci algo urgente cu e mando di polis y henter e aparato hudicial.
Di ora cu e acusacion a start contra Tjon, mester a realisa cu wega amoroso aki a secuestra henter nos sistema hudicial. Poco hende a realisa cu ta un hefe di recherche a bay traha yiu cu un asistente di fiscal di Ministerio Publico. Pues ta top di polis a topa cu top di husticia y nan dos a acusa otro. Procurador General e tempo aya a prefera sconde e caso y purba scapa cara di husticia, sin tene cuenta cu e mucha, e victima! Un hues civil a mira e asunto diferente y a dicta un sentencia cu Rocco Tjon no mag yega cerca di su yiu. El a apela e sentencia y tres hues a mira e asunto mesun cos y a mantene e sentencia di corte di prome instancia.
Su tras a sigui añanan di persecucion tras di e polis cu a testigua den e caso aki. Tur otro colega di dje, den su mesun klas, tabata haya promocion, menos Kock. Tur a haya chens pa progresa, pa bira hefe of pa crece den e cuerpo, pero e cabes di Kock semper a keda riba mesa di sacrificio. Awe cu el a gana su caso, altocomisario Tjon-Kock, e mesun casa di e parlamentario envolvi, a opta ta apela e sentencia di hues tambe pa toch purba mira si tres hues lo dun’e rason cu Kock no por keda den cuerpo di polis.
E situacion aki ta laga hopi hende cu pregunta atras, kico lo sosode si yega na un scenario cu e Minister di Husticia ta casa di e altocomisario di Cuerpo Policial di Aruba? E lo no ta un conflicto di interes? Con lo persigui tur polis cu no ta di acuerdo cu e “kliek” den top di polis of cu no a sostene Tjon den campaña? Prome cu a yega na e scenario ey, ya e pareha a demostra nan sed di poder y kico tur nan ta capas di haci, te ora cu hues den caso di ambtenaar a kibra e poder aki.
