Gobierno di Aruba a decreta e aña 2021 como aña di recuperacion. Recuperacion na prome luga economico, di crea mas oportunidad nobo pa tur hende. Prome Minister Evelyn Wever-Croes durante un rueda di prensa, a papia di un aña di recuperacion y den fondo por mira un logo cu ta ilustra e decision pa decreta e aña di recuperacion.
El a splica cu den e logo aki por mira kico ta loke ta vislumbra cu recuperacion.
Pa cuminsa turismo y pa cual e avion cu ta den e logo ta representa e sector aki. Ta mira tambe e maishinan cu ta ilustra e agricultura cu ta concentra riba dje. E recuperacion financiero cu esaki ta trece cu ne.
Pero tambe recuperacion den enseñansa pa loke a cay atras door di e pandemia. Recuperacion social, mas atencion na famianan, pa asina frena problemanan social. Recuperacion di salud, cu e vacuna na caminda, cu ta pone un luz na final di e tunnel. Y recuperacion laboral pa crea mas cupo di empleo.
Tur esaki por logra solamente si traha hunto, si tur uni den un solo meta, cu ta e meta “Aruba”. Sin descuida, siguiendo tur e protocolnan pa por sigui proteha nos salud y e salud y bida di esnan cu cada un ta stima.
E vacuna ta na caminda, e prome mandatario a enfatisa, cual ta crea un speransa. Pero mester keda uni mas tanto posibel y asina cu optimismo traha pa e recuperacion di nos pais.
Prome cu fin di aña Minister di Finansas a anuncia rebaho di tarifanan di impuesto pa asina por aumenta e poder di compra di cada ciudadano. Tin cu keda enfoca riba partinan positivo y cu optimismo enfrenta e aña nobo aki.
