Casonan positivo activo a pasa 300

Cifranan di awe ta mustra un biaha mas, mescos cu den luna di augustus, e cantidad di casonan positivo ta mustra un spiral di aumento. Esaki, prome minister Evelyn Wever Croes a bisa den conferencia di prensa ta relaciona cu tur e cenanan di Pasco den luna di december.

E resumen ricibi for di Departamento di Salud (DVG), ta menciona cu 9 persona a recupera, a registra un total di 42 caso nobo di COVID-19, di cual tur ta residente y 15 ta residentenan cu a bolbe Aruba for di exterior.

Cantidad total di testnan ehecuta ayera na e diferente localidadnan entre otro laboratorio di hospital, laboratorionan priva y aeropuerto ta 700 test,  ‘positivity rate’ local riba dia di ayera ta 45%).

Activo tin awe 339 caso, cantidad di fayecido relaciona cu COVID-19 ta keda igual, 49.

Hospital ta informa cu tin un total di 12 persona interna di cual 4 ta den Cuido Intensivo y 8 riba unidad general di COVID.

Si analisa e cifranan adicional, por bisa cu for di maart te cu aworaki a haci un total di 68.630 test di cual 41.703 a haci na aeropuerto di Aruba. Di e total aki 62.988 test a sali negativo. For di maart pa awo, tabatin 5606 test cu a duna resultado positivo.

Prome minister Evelyn Wever Croes awe mainta a adverti cu mirando e dianan di fiesta tras di lomba, lo por spera mas aumento di e casonan positivo, cu ta e motibo tambe cu a prolonga e Toque De Queda.