Gobierno di Aruba a laga start un investigacion den companianan estatal pa verifica si tur ta cumpliendo cu e ordo pa reduci salario y beneficio di trahadonan cu 12,6%. Gobierno no tin confirmacion cu companianan no ta cumpliendo, pero si resulta cu esey ta berdad, e ora lo tuma medidanan necesario pa garantisa cu tur ta cumpli igual, di acuerdo cu locual minister-president a firma cu Gobierno di Hulanda. Bisando esaki, Minister Geoffrey Wever no por a duna e trahadonan di SETAR afilia na sindicato STT nan gana, esta pa cobra bonus completo mescos cu e trahadonan di WEB, ELMAR, Aruba Airport Authority, RdA y FMSA, por ehempel.
Den nan carta di protesta, e sindicato STT, cu entretanto tin 27 aña di existencia, ta conta cu no menos di 321 miembro activo. Nan ta pidi pa haya e mesun trato cu e demas companianan estatal ta haya, pa scoge con nan ta desea di aplica e recorte y hasta tin cu a dicidi cu no ta corta nada di e trahado, sino e compania ta djis paga y cla. Un di e companianan asina ta Aruba Airport Authority, cu ta aporta na e fondo aki, sin cu ta kita ningun cen di trahadonan mensualmente. Claro, ya cu a duna nan e opcion ey, e trahado di SETAR tambe lo desea si nan doño di trabou por haci mesun cos, esta paga Gobierno e 12,6% nan mes y no mishi cu nan salario, manera cu ta e caso awo.
E problema aki a crece mas siman pasa, ora cu a bin resulta cu e trahadonan di N.V. ELMAR si a haya un “bonus” di 13de maand e fin di luna aki, pasobra nan a firma pa freeze nan salario pa otro aña. Pues pa nan corta otro aña, nan a haya un gran parti di loke nan a corta e aña aki bek den un solo bonus. Despues a bin resulta cu esaki no tabata un decision di e director di N.V. Elmar, sino di metemento directo di Minister Glenbert Croes, cu a sinta reuni apart cu Diego de Cuba (ex-coordinado di minister) di sindicato STA y a logra e areglo aki contra e decision di Utilities Aruba N.V. y contra e decision di e director di N.V. Elmar mes. Ta mesora e trahadonan di WEB y SETAR a activa, pasobra si e minister por “regla cos” pa un compania, anto e ora e tin cu regl’e pa tur.
Kisas ta bon pa corda si cu ta e mesun tipo di decisionnan asina den pasado, a hinca e mesun mandatario aki den problema serio na WEB Aruba N.V., unda a cobr’e un suma grandi bek pa aumento salarial cu el a regla pa e trahadonan eynan sin cu e tabatin e poder pa haci tal. Por corda cu ta e mesun bufete di Croes, Wever & Ruiz a persigui Glenbert Croes den nomber di Gabinete Oduber. Awe, lo a imagina cu e ta mas cauteloso cu e tipo di decisionnan asina, pero toch a haci e mesun cos, poniendo su mesun Ministerio di Energia bou di un presion enorme y incluyendo e Ministerio di Comunicacion, di Minister Geoffrey Wever, bou unda SETAR ta resorta.
Un decision final no a cay ainda den seno di STT pero por sinti for di e trahadonan di SETAR cu nan kier subi caya pa protesta, pasobra e maneho di Ministerio di Energia no ta concorda cu esun di Ministerio di Comunicacion, pa e mesun companianan estatal. Esun ta cobra bonus y e otro no, aunke cu a cambia e nombernan, pero hecho ta cu fin di november na Elmar trahadonan lo cobra dos salario y na SETAR esaki no ta e caso. Y tanten cu no resolve esaki, SETAR ta plania di bay plat, sea Gabinete Wever-Croes II ta paga bonus na trahadonan di SETAR tambe of mester kita esun plania pa paga na WEB, RdA, FMSA, AAA y na ELMAR, pa por tin solidaridad den tumamento di decision y respetando e areglo cu minister-president Evelyn Wever-Croes a firma cu Gobierno di Hulanda.
