“E dirigentenan mester responsabilisa nan mes pa nan maneho y esaki ta parti di responsabilisa. Cos a bay robes y awe Aruba ta bibando cu e consecuencianan y lo bay biba cu mas consecuencia,” segun parlamentario di AVP, Gerlien Croes.
Pregunta ta cu si mester a haci reformacion den sector publico, tur hende sa cu mester a bin cu cambio. Pero no por bin propone tipo di medida asina sin cu ta cuantifica y sin cu ta substancia nan.
Kico e 15.5% aki a nifica pa pueblo. Ken e lo afecta. Cuanto ta bay haya door di haci e cortamento aki. Con largo tin cu bay haci e cortamento aki. Kico ta bay negosha. No por bay sinta cu Hulanda y propone algo y despues ta bay busca pa mira con ta bay hacie y kico ta bay haci.
Riba dje no ta bisa comunidad tampoco e berdad. Esey ta locual cu Croes ta kere cu Aruba mester realisa su mes, cu e incapacidad eynan cu tabatin ta refleha grandemente pa loke ta e situacion cu Aruba ta bibando aden.
BEZUINIGINGSPLAN
Den e mesun rosea, Croes a duna un ehempel, cual nan a yega di papia riba dje, cual ta e ‘bezuinigingsplan’ pa loke ta salubridad.
Den un reunion publico siman pasa, a bin na cla cu a entrega un ‘bezuinigingsplan’ dia prome di juni 2020 y ocho luna despues e minister ta bay pidi conseho na AZV y e Nationale Zorgcommissie, cua ‘bezuiniging’ lo ta miho. Kico lo bay ‘bezuinig’ di berdad, cual lo tin of no lo tin efecto riba esaki of esaya.
Con por ta posibel cu ta bay bisa Hulanda cu tin un plan, present’e y despues di ocho luna ta bay busca pa sa con ta bay corta.
DIALOGO SOCIAL
Croes a tuma nota tambe cu tabatin algun publicacion y siman pasa caba e minister a trece esaki dilanti. Minister a menciona tocante e ‘eigenbijdrage’ y a uza e palabra ‘Dialogo Social’, proceso cu e gobierno anterior a hiba, unda cu a sinta na mesa cu tur stakeholder na momento di tuma decision improtante.’
Croest a contento cu a referi bek n’e periodo aki y aunke no ta importante mas n’e momento aki pasobra tin cu mira padilanti, e ta kere cu esaki ta e miho ehempel.
Prome cu Croes a drenta politica, el a haci su huiswerk y a lesa tur locual cu tabata documento di maneho proponi, ehecuta, incluso e documento cu ta consisti di casi 100 pagina, con a sinta na mesa cu stakeholders pa dialoga y tuma decision conhunto. Croes ta contento cu a referi n’esaki pasobra esey t’e manera pa goberna un pais.
No n’e momento aki cu na final ta realisa y mira cu gobierno a djis hisa benta na Hulanda propone kico cu ta y despues ta bay wak kico ta bay haci y awe Aruba t’esun cu ta carga e consecuencianan.
