E beach cu tin net entre Strandpolitie y Riu Palace ta un di e ultimo areanan cu nos localnan por haci uzo di dje. Eynan tin un palo di Kwihi caminda cu pa hopi decada, grupo di famia ta bin pasa nan diadomingo un rato ameno.
Un tempo por a bay hasta un tiki mas panort, pero awendia esaki ya no ta posibel, pasobra tin biaha ta haya molester of no kier stroba turista.
Pocopoco nos mesun hendenan ta perde e areanan di uzo di nan tin. Tin un preocupacion grandi pasobra tin un grupo di hende, biba na Aruba, di un edad respeta cu tambe ta preocupa. Ya caba nan tin cu sinta poco pabao di un area cu nan ta uza pa cana. Ta trata di hende cu ta riba e edad di 60 aña. Tin di nan cu cierto limitacion, pero cu ta uza e area aki pa asina mainta trempan bin den un grupo hunto, caminda cu nan ta haci ehercicio, pa asina train y move nan curpa.
E grupo aki kier a vocifera nan preocupacion y por a mira tur loke ta plywood blauw cu ta area cu antes tabata accesibel, no ta asina mas.
Tin un voetpad caminda cu ta blokia pa e barera aki. Parti patras di e plywood blauw, ta bezig cu un otro hotel y probablemente Strandpolitie tambe lo disparce for di e sitio.
Esaki ta un situacion preocupante, pasobra nos localnan tambe kier haci uzo di e espacio aki. Boy Escalona ta un di e personanan cu tambe a uni n’e lucha aki. E ta conta cu e ta hopi preocupa pasobra e tin mas cu 40 aña cu ta haci uzo di e beach aki, mescos cu hopi otro hende. Hopi hende ta bin beach pasobra e ta bon pa salud.
Tur ta bay n’e beach pa train, ta gosa di e beach. Hende cu ta malo, dokter ta manda nan beach y bao guia nan ta bay den lama.
No tin nada contra turismo. Turismo ta nos bida, el a splica. Pero e lama y e beach mester ta uza p’e local y e turistanan. “Hunto nos ta haci uzo di dje.” Loke ta pasando e hotel bao di construccion, ta kita e derecho di comunidad. Derecho di pueblo pa nan tambe haci uzo di e beach. Esey ta loke nan ta contra. No contra turismo. Laga e turistanan bin, y hunto gosa.
