Awe mainta e delegacion di Aruba, encabesa pa Minister di Energia, Glenbert Croes, sosteni pa Minister Plenipotenciario di Aruba na Hulanda, mr. Juan “Ady” Thijsen y cu presencia tambe di e director di Utilities Aruba N.V., WEB Aruba N.V., Refineria di Aruba (RdA) N.V. y N.V. ELMAR. Nan a atende na un presentacion masha impresionante con avansa e mundo di hidrogeno ta na Groningen, Hulanda. Un proyecto ambicioso cu ta cuadra cu e vision di Gabinete Wever-Croes II.
Patrick Cnubben, gerente di strategia hidrogeno na New Energy Coalition tabata compaña pa Meiltje de Groot, director di Airport Groningen Eelde y Jonas van Dorp, gerente comercial y di comunicacion na Groningen Airport Eelde, durante un presentacion na e delegacion di Aruba.
Despues di e presentacion, a hiba e expertonan Rubiano pa bay admira e Proyecto di aeropuerto Eelde den e “Hydrogen Valley” na Hulanda. Meta di e aeropuerto aki ta pa den shete aña di tempo, esta na 2030, nan mester ta opera riba 0 emision.
E ecosistema di e aeropuerto aki ta consisti di 5 sector, cu su parke di panelnan solar, e tin su electrolyzer cu ta percura pa e conversion di energia, e tin su area di almacena hidrogeno y e tin su Hydrogen fueling station como tambe su Hydrogen ground handling. Ademas di esaki, Aeropuerto Eelde, tin su academia pa studia pa bira piloto. E delegacion di Aruba a keda impresiona como tambe entusiasma pa hunto por converti Aruba den e prome Hydrogen Valley den region.
Mester menciona cu despues e delegacion di Aruba a bishita e facilidad QBuzz, cu ta un facilidad di transporte publico cu tambe ta funciona completamente riba hidrogeno, mescos cu transporte aereo.
Na aña 2017 QBuzz a cuminsa cu un programa piloto di busnan cu ta funciona unicamente riba hidrogeno. A inicia cu dos testbus, pa cual a entrena chauffeur, pa nan cera conoci cu e industria y alimenta nan conocemento prome cu a expande pa mas bus. Na 2021 a agrega 20 bus mas na e flota pa habri e caminda di 0 emision pa 2030. Aña pasa a agrega 10 bus mas completando un flota di 32 Hydrogen bus.
Hydrogen Valley Groningen ta consisti di diferente sector y facilidad cu ta funciona unicamente riba hidrogeno, cu ta cuadra cu e vision di Gabinete Wever Croes II y di Minister Glenbert Croes pa converti e zona actual di refineria den e Centro di Energia y e prome Hydrogen Valley den Region.
