Aña pasa den luna di maart a sosode un accidente, unda e turista Cassidy Murray di diestres aña a perde su bida. Linda y Dave Murray, kende ta e mayornan, na Merca a papia na Good Morning America pa asina adverti riba accidente di tube cu e meta pa preveni tragedia similar pasa cu otro.
“Ya ta yegando un aña desde cu el a fayece. Y, bo sa, desde prome dia nos meta semper ta pa crea conscientisacion, pa preveni cu otro famia pasa den esaki”, asina Linda Murray a bisa Good Morning America.
Na maart 2022, famia Murray a bin di vakantie y un dia prome cu nan mester a regresa, nan yiu muhe kier a bay tubing. Dave Murray a compaña su yiu haci e actividad aki cu Fun 4 Every 1, compania cu a mercadea su mes di duna “e miho aventura di watersports di Aruba.” Murray a conta cu cinco minuut den e actividad, su yiu a cay na awa. Pero na momento cu a bay bek pa busc’e, aki e capitan a perde control.
“E tabata den awa, tabatin un salbabida. Mi a dun’e señal. E tabata safe”, Dave Murray a bisa. “Momento cu e capitan a acerca Cassidy, el a dal e, a perde control dje boto… El a dal e ful trottle.”
ABC News a acerca doño di un 4 Every 1 pa comentario, pero no a haya ningun contesta.
Despues cu e boto a dal Cassidy, Murray a indica cu e capitan a “paralisa” prome cu el a yud’e trece su yiu bek tera. “E capitan cu tabata maneha e boto, no tabatin prome auxilio”, el a expresa. “Si tabatin un di dos persona riba e boto, aunke tabata un spotter, e lo por a mira cu nos tabatin un opcion pa slow down of e por a mira di biaha ora Cassidy a cay dje tube.”
Ministerio Publico cu ta atende cu e caso a bisa Murray di no a haya ningun ofensa criminal den morto di Cassidy. E fiscalnan a bisa ABC News den un comunicado, un parti, cu “hopi turista ta haci diferente actividad acuatico. Lamentablemente, den caso specifico, esaki a resulta den un accidente di boto cu un resultado teribel… No tin evidencia di ofensa criminal y p’e rason ey, oficina di fiscal no ta envolvi den e areglo y maneho dje accidente aki.”
Famia Murray a bisa di a trece e caso aki na atencion di prome minister y directiva di turismo. Autoridad di Aruba a bisa ABC News cu “e Gobierno di Aruba ta tuma na serio e siguridad di su bishitante- y residientenan”, y cu nan “ta evalua ampliamente e protocol di siguridad actual y potencial, tambe ta tuma medida pa garantisa cu ta cumpli cu nos regla- y procedementonan.”
Experto, manera Jim Emmons, director ehecutivo di Water Sports Foundation, Inc., a bisa cu ora di book actividad pafo di Merca, pa haci uzo di precausion extra, inclui puntra e compania si e tin licencia y seguro, check pa ekipo di siguridad abordo y sigura tin un observador pa mira hende den awa.
“Bo kier pa otro persona ta riba boto tambe mira constantemente”, Emmons a bisa. “E regulacionnan unda bo ta bay no lo ta manera na Merca… E cumprado mester ta cauteloso. Sea cuidadoso. Haci bo diligencia debido.”
Linda Murray a expresa di spera cu e storia di su yiu muhe yuda preveni accidente mortal den futuro. “Mi ta spera cu un hende ta para na canto di beach y, ora di subi boto y bisa, “warda, mi ta recorda e entrevista ey. Warda, corda kico e famia a bisa? Por ta nos mester check esaki. Por ta nos mester puntra e pregunta aki”, el a bisa.
