Comision Arubadag festival Virtual Edition 2022 a informa un rato pasa cu pa motibo di placa, a dicidi di cancela e evento programa pa e aña aki. Aunke cu Aruba ta bou supervision financiero y a keda sin haya tranche di likides desde aña pasa, toch Aruba Huis a imagina di organisa e celebracion aki den maart 2022. A cuminsa tuma contacto cu bandanan musical di Aruba pero e “idea” so a cay den masha mal tera, specialmente pasobra ambtenaarnan keto bay ta entregando parti di salario y companianan estatal no tin fondo pa sostene e fiesta aki.
E realidad di e situacion financiero di Aruba – cu te ainda ta leu di un recuperacion total pa motibo di e pandemia di COVID – ta pone cu no tin otro opcion cu cancela e edicion virtual di un Arubadag. Bou di e condicionnan actual simplemente un reto inalcansabel pa e Comision Arubadag.
Minister Plenipotenciario Guilfred Besaril a bisa cu “Pa nos di Comision Arubadag y ami como Minister Plenipotenciaro, e situacion na Europa unda tin un guera andando y cu tin su impacto riba henter e continente, ta un motibo di igual importancia cu e situacion financiero di Pais Aruba. E no ta mishi cu e amor profundo cu e Rubiano ta sinti pa su himno y bandera, pero e ta pone riba mesa si e pregunta cu si e ta realmente e momento propisio pa fiesta aki na Europa.”
“Tumando na consideracion tur e aspectonan aki, comision Arubadag Festival 2022 a tuma edecision dificil pa cancela e evento pa e aña aki y concentra riba e preparacionnan pa 2023. Nos ta lamenta e decision aki, den bista cu comision Arubadag Festival 2022 pa luna nan a
traha duro den e prepraracion pa e evento aki. Esaki tambe ta conta pa artistanan y otro persona y companianan cu desde un principio a cana cu nos e caminda aki pa yega na un celebracion special,’ asina Minister Plenipotenciario Guillfred Besaril a termina bisando.
