Diadomingo anochi, un poco prome cu 12:00 am, polis a bay direccion rotonde Santa Cruz p’un accident. Unabes cu nan a yega na sitio nan a tuma nota di un Hyundai Accent pega riba e pilonnan di beton cu daño material considerabel. Esaki tabata na altura di Nova Medical Center.
Afortunadamente e chauffeur di e vehiculo accidenta a resulta ileso, pero e auto a haya basta sla n’e parti abou como tambe na e tirenan.
Segun e chauffeur a splica na sitio, net el a baha e rotonde pa bay abou ora cu el a wak cu e auto su dilanti a dal un pushi mata. Debi na algun trauma cu e tin relaciona cu dalmento di cacho, el a hala e stuur p’e no pasa riba curpa di e pushi. Sinembargo, esaki a pone cu e auto a baha for di caminda y subi e acera y e pilonnan beton.
Roadservice a bin na sitio pa asina regla e parti di seguro, mientras e hoben mes mester a bay duna cuenta di kico a pasa cu e auto, ya cu esaki no tabata di dje.
