Den cuadro cu reunion cu porta cera den Parlamento di Aruba relaciona cu e caso di helicopter, Parlamentario mr. Gerlien Croes ta bisa cu e reunion aki tabata mescos e helicopter: pregunta y contesta a keda den aire. “Esey ta e simpel realidad. No ta solamente tin un sospechoso, tin varios cosnan sospechoso den e caso aki.”
E parlamentario ta subraya cu na momento cu Gobierno di Aruba saca un Openbare Aanbesteding, bo tin algun rekesito cu bo ta pidi e compania pa cumpli cu ne. Direpiente, e consehero di minister ta haya un carta – despues di a haya reaccion di algun compania – pa pidi Directie Wetgeving pa cancela e proceso pasobra ningun hende no a cumpli completo cu e rekesitonan.
COMPANIA NO A CUMPLI CU REKESITO
Parlamentario Croes a haci e pregunta na minister encarga, cu bo ta mira caba e compania no a cumpli cu e rekesitonan y despues ta saca un ‘Request For Information’ (RFI) unda e compania ta bolbe bin dilanti anto e ora si e ta cualifica. Tin dos compania prome cu ne cual si ta cualifica, pero pa motibo cu e helicopter ta situa na Venezuela of Merca e no tabata e momento ey werkbaar pa nan. Tog na final di dia a escohe pa e compania actual. E parlamentario a manda pregunta na minister pa duna lista na prome instante di rekesitonan cu nan no a cualifica den e prome procedura. Pero kico a cambia cu na e segundo procedura si nan a cualifica p’e. “Aruba kier sa. Pasobra con por ta posibel, e ta crea un sospecho cu bo ta beneficia un compania, pero cu ki motibo?” E parlamentario ta bisa cu no tabata tin contesta pero mas bien indicacion relata na e prijs ofreci. Pero no ta solamente relata na e prijs, tin varios rekesito mas.
