Minister di Husticia, Rocco Tjon, tabata presente den Parlamento di Aruba pa atende e asunto di helicopter. E reunion aki tabata porta cera. E Presidente di Parlamento di Aruba ta reta oposicion pa entrega keho riba e echo cu si tin corupcion haci riba lease di helicopter.
mr. Edgard Vrolijk, Presidente di Parlamento di Aruba, a indica cu esunnan cu a haci pregunta, hopi a kibra nan regla. E ta haya cu un biaha mas tabatin mentira tras di mentira. Oposicion a bisa cu coalicion no a haci pregunta, pero Vrolijk ta nenga esey. El a indica cu e mes a haci pregunta, incluso otro parlamentario cu ta den coalicion tambe a haci pregunta.
El a enfatisa cu por a mira e mentira cu a bin dilanti, pero nan si ta papia cu e berdad. Nan a drenta e reunion cu un punto di agenda. E punto tabata cu si a gara un persona na 2022 cu tin un cas aworaki, ta parti di e compania of no y desde ki tempo. Tur informacion tabata para cla den e documentonan cu desde 2019, final di 2020, e persona no tabata den servicio cu e compania. E persona aki tabata piloto comercial cu a bin Aruba pa explora y mira. Pero, desde 2020 e no ta miembro mas di e compania.
Segun Vrolijk, un biaha mas e por a tende di aandeelhouder (accionista), incluso a bay te 2015. Den e documento tabata poni bon cla cu e no tabata accionista y desde 2015 en adelante no tin nada riba e persona aki. Hopi a cuminsa grita pa mira prome cu 2015, di cual tabata e preguntanan, segun Presidente di Parlamento.
E ta haya cu e pregunta cardinal tabata cu si e persona aki tabata den servicio ora el a caba na 2022, si of no. El a enfatisa cu esey no tabata e caso, e no tabatin nada mas ke haber cu nan.
Awo cu e cosnan aki a sali un aña despues, e compania a bin cu ne dilanti na prensa. “E prensa cu a sac’e mester a rectifica”, el a indica. Tur documento a mustra cu e persona aki no tabata den servicio ni accionista cu e compania, cual eseynan tabata e puntonan. Vrolijk ta lamenta e cos aki y tur esaki ta politica. E ta haya cu mester trece punto serio.
P’esey e ta reta oposicion pa bay Ministerio Publico y entrega keho si tin corupcion cu e lease di helicopter.
