Cu asombro y manera un bofta den cara di e huristanan, minister-president a manda un carta como contestacion riba e pregunta haci door di fraccion di AVP, si Minister di Salubridad Dangui Oduber ta un sospechoso den e caso di vacuna gate na e momentonan aki.
No solamente a desvia di e hecho cu e minister encarga di e departamentonan unda e fraude a tuma luga tin un responsabilidad politico, pero alabes ta purba di sconde e hechonan cu entre otro Minister Oduber ta esun cu a nombra e campañadornan aki na pia di trabou como arbeidscontractant y tambe a duna nan un carta di bon recomendacion na momento cu nan a wordo kita for di trabou pa motibo di fraude grandi cometi.
Segun e ley popular di integridad cu gobierno a carga na halto tanto tempo un minister mester informa e minister-president durante gobernacion si tin situacionan of hechonan cu a presenta cu lo tawata situacionan cu lo a tene cuenta cu ne tambe prome cu e por a pasa screening pa huramenta.
Minister-president na su luga ta manda Parlamento di Aruba un analisis completamente robes y cu interpretacion propio pa uza esaki na fabor di e situacion y ta pone descripcionnan huridicamento incorecto unda hasta ta capaz di bisa den 1 di su conclusionan cu e articulo pa cu control di integridad despues cu e minister wordo nombra caba y ta den funcion, (Art 13) no ta aplicabel ora tin hechos y situacionan nobo y recien wordo constata. Den otro palabra, ley di integridad no ta aplica despues cu bo huramenta si presenta hechonan of situacionnan nobo, cu wordo constata recien y cu ta contra tur prinicipio di integridad.
No solamente e Articulo 13 aki ta referi na un Articulo (2) inciso cu ta inclui investigacionan hudicial, pero tambe e articulo no ta limitativo na e lista di hecho y situacionnan menciona den e segundo inciso manera e promer minister ta purba discribi.
Segun promer minister, su persona a confirma cu Openbare Ministerie cu na momento aki no tin investigacion andando contra e minister di salubridad y cu ta algun arbeidscontracten cu tawata traha na DVG ta wordo investiga na e momentonan aki.
Pregunta primordial ta keda si ya caba OM a yega asina leu pa identifica ken ta e beheerder di ful e sistema cu ta traha como man drechi di e minister encarga y alabes kiko OM ta considera di e hecho cu e personanan aki a wordo kita for di trabou despues cu a constata e fraude y minister a traha un carta di BON recomendacion pa nan pa asina nan por keda keto y sigui busca un otro trabou y laga tur e realidad di e miyones cu e wordo traha cu e vacuna-gate aki den un doofpot. Pueblo kier sa kico ta e motibo cu tin e sistema y datonan di comunidad riba un cloud (internet) warda den un asina yama blockchain system y kico tur ta minister su actividadnan cu su persona y tambe conseheronan ta hibando riba e sistema aki. Ta 1 persona tawata encarga cu duna e acceso na ful e sistema y tawata tin e control di tur locual tawata sosodiendo y esey sigur no ta e arbeidscontractenan cu prome minister ta menciona.
