Parlamentario independiente, Gerlien Croes ta subraya cu Aruba conoce un desaroyo di turismo sin limitacion pa hopi tempo caba, y hopi bes ta wak diferente gobernacion ta culpa otro p’e desaroyo aki cu a bay for di man. Varios biaha durante reunion den sala di parlamento recientemente, varios pregunta a bini dilanti riba ken a duna opcion riba ultimo terenonan y ken a firma ultimo acuerdonan duna na companianan cu ta desaroyando of construyendo hotel riba Aruba.
Parlamentario Croes a manda diferente pregunta na prome minister di Aruba pa por duna mas claridad riba kico ta e maneho hiba ultimo añanan, kico tabata e cambionan den esaki. Na momento cu por ehempel ta duna precario pa palapa, ken ta responsabel of doño. Tin otro hotel ta den espera e ultimo dies añanan di precario y no a haya, kico ta e maneho pa ken por haya permiso of no, y kico ta spera Aruba, tur esaki Croes kier clarificacion riba dje. “Mi ta spera prome minister por clarifica y duna informacion na comunidad di Aruba. No ta solamente a base di e hecho cu nos ta wak tanto construccion, pero tur esaki ta bay bin cu hopi mas cu ne.”
Un gobierno ta culpa e otro, sigui laba man y mientrastanto ta sigui beneficia financieramente ora cera e dealnan. “Hopi di esakinan ta representa pa medio di bufete di abogado hopi cerca di minister-president.” Pero sin mas, no ta solamente desaroyo di construccion ta un preocupacion grandi aworaki pero preguntanan cu ta bini dilanti riba e uzo y maneho di strand. Ora core rond di nos beachnan di Aruba na momentonan aki tin desaroyo di basta permiso of precario duna pa añas na diferente hotel pa pone palapa y mas.
“E pregunta na prome minister, na momento cu cera acuerdo, cu por ehempel tres Ibero Star cu Aruba lo conoce, kico tur a mara na e acuerdonan aki?”
KICO TA SPERA ARUBA DEN FUTURO
E parlamentario ta bisa cu e 1900 cambernan cu Aruba lo bay conoce den e proximo dos aña, unda lo bay pone e hendenan aki riba beachnan y con reparticion di precario lo ta. Pasobra no por imagina cu prome minister a bisa pa construccion tuma luga pero cu no por uza beach of haya permiso pa precario. Mester cuminsa cuestiona esaki pasobra ta defini e futuro di e pais aki. “Mester hiba dialogo nacional riba e topiconan aki cu ta bay regarda nos tur. Un RWZI mes cu ainda no tin solucion p’e pero nos kier papia di 1900 camber na caminda.” E parlamentario ta bisa cu ta importante pa papia riba posibel solucionnan hunto y dicidi tambe como pueblo di Aruba unda nos kier wak nos isla bay.
Nos a maximalisa desaroyo economico na Aruba y aworaki kico nos ta bay haci pa mantene y cuida loke nos tin, y ken nos tin cu pone responsabel pa mal maneho tambe.
Na momentonan aki no por keda riba un free for all, mester respeta companianan pa inverti cu pa nan si nan haya oportunidad nan ta yega tum’e. Pero mester pone gobernantenan cu ta tuma decision p’e pais aki responsabel pa no pensa riba e efecto of impacto di desaroyonan aki ta pa e pueblo.
Algun organisacion manera Aruba Tourism & Hotel Association (AHATA) mes a sali ta bati alarma caba cu lo tin mester mas trahado den sector di hotel den e proximo añanan nos dilanti na Aruba. Pa 2030 nos lo tin 1500 pensionado mas, cual ta nifica tambe cu 1500 hende menos trahando dus kico Aruba lo haci pa migracion of trece trahado, of lo legalisa personanan cu ta akinan caba. Tin hopi topico cu niun politico cu a hinca nos den e situacion aki no kier papia di dje segun Croes, pero e realidad ta si cu nan cu a hinca bo den e situacion aki lo saca bo di dje.
