Parlamentario independiente, mr. Gerlien Croes, a manda un serie di pregunta den direccion di Minister-President Evelyn Wever-Croes como e titular encarga cu desaroyo teritorial p’e duna cuenta di varios aspecto den otorgamento di permiso di construccion di hotel, pero tambe e acceso y uzo na beach publico y ta wardando su contesta. Esaki ta djis algun di e preocupacionnan cu ta biba den comunidad pa loke ta trata e 1.900 camber di hotel nobo cu tin na caminda.
Realidad ta cu Aruba a conoce un desaroyo economico y turistico sin limite pa hopi aña, mientras cu diferente gobernacion ta culpa otro pa cu esaki. Aunke no kier asumi responsabilidad, si ta beneficia financieramente, manera ta e caso di e bufete di abogado liga na gobierno actual cu ta esun cu tramita tur acuerdo di benta, traspaso, permiso, etc.
Fuera di e aumento den cantidad di camber, tin tambe e preocupacion pa cu maneho y uzo di beach y lama. Ciudadano ta tuma nota di permiso duna na diferente hotel pa pone stoel of construi facilidad y debi na esaki ta bin e pregunta di kico tur ta mara na e aprobacion di proyecto nobo manera Iberostar, St. Regis y e otronan.
Parlamentario Croes a indica cu e no por imagina su mes cu prome minister a djis bisa na e cadenanan hotelero aki: “Bin construi hotel numa, pero beach si boso no por bay haci uzo di dje”. Mester cuestiona esaki pasobra e ta defini e futuro di nos isla. P’esey a manda pregunta specifico na minister-president.
Croes kier sa con e maneho tabata tur tempo di su mando? Ken tur a haci peticion pa permiso precario? Ken si a haya caba y ken ta wardando ainda y dicon? Con otorgamento ta hinca den otro? Ken ta encarga cu e trabou of supervision di instalacion di palapa? Con acceso ta cambia pa publico? Ta spera cu minister-president por bin parlamento pa clarifica y duna informacion na publico.
Adicional na esaki tin cu pensa tambe riba e forsa laboral necesario, cu ya organisacion local manera AHATA a indica cu no tin suficiente ni sikiera pa e hotelnan cu t’ey caba. Tambe tin e embehecemento di nos poblacion cu ta reduci e cantidad di persona den edad laboral, mescos cu e efecto riba capacidad di enseñansa, vivienda y otro servicio publico.
“Tur esaki ta cos cu e politiconan cu a hinca nos den e situacion aki no kier papia di dje. E realidad cu nos tin cu acepta ta cu nos a maximalisa e desaroyo economico. Awor nos mester wak kico nos ta bay haci pa mantene y cuida loke nos tin y ken ta bay para responsabel pa e mal maneho di pasado. E compania multinacional a tuma e oportunidad di inversion cu el a haya su dilanti, pero ta nos mandatario a brinda e oportunidad ey sin pensa riba condicionnan husto”, asina Gerlien Croes a expresa. “Awor cu e baca a hoga caba, diripiente despues di casi 7 aña cu nan ta goberna y cu e preguntanan a sali pa e minister-president cu ta esun encarga, gobierno ta anuncia maneho nobo di otorgamento di permiso pa hotel”, asina Croes a duna di conoce firmemente.
