Despues di un training basta intensivo di varios luna, p’e por haya e condicion necesario y cana 64 kilometer pa dia durante cinco dia largo, Gerald Pellegrim, a haci su maximo esfuerso pa den cinco ora di tempo, yega na top di sero Nevado del Tolima na un haltura di 5215 meter halto diabierna ultimo.
Sero Nevado del Tolima, antes yama p’e indigenanan nativo como ‘El Dulma’, ta un volcan activo cu, hunto cu e volcan ‘Nevado del Ruiz’ y ‘Santa Isabel’, ta forma parti di e area protegi di ‘Cordillera Central de los Andes’ y e parke nacional di Los Nevados n’e departamento del Quindio, Risaralda, Caldas y e departamento yama El Tolima, na Colombia.
Durante subida di Nevado del Tolima, dos otro ekipo no por a logra subi e top, debi cu algun di nan a bira malo door di e haltura y otro a haya lesion durante e subida.
Pa medio di esaki Gerald ta gradici su guia Richardo Ernesto Rubio y su compania Ascenso Andino, pa yud’e yega n’e top di sero Nevado del Tolima.
Tambe Gerald no kier a keda si gradici e ekipo cu a yud’e na Aruba cu e training necesario pa su mesa cu ta entre otro:
Su entrena dor personal Eduardo Jose Arias Solano, su hiking coach Neohmar Maduro, su psicologo deportivo Robert Leal y su conseheronan special T’Jay Farro y Alvaro Velasquez Theysen.
Tambe e kier a gradici na henter su famia y na su mama Julie Flemming, su coleganan di Ritz-Carlton Hotel Aruba, cu a dun’e tur e sosten necesario. Tambe na su tanta Angeline Flemming y su prima Janelle Flemming, cu tabata train ‘all the way’ cu ne na Aruba, pa asina e logra su meta.
