Diadomingo a tuma luga evento exitoso pa recauda fondo organisa pa T’Real na Carnival Village San Nicolas. Ta trata di un grupo di motociclista cu ta practica e deporte y cu ta na caminda pa Corsou pa representa nos isla.
Hopi ta esnan cu a brinda nan aporte cu compra di cuminda pero tambe cu e rifa cu nan tabata tin. Na prome instante a pensa cu e evento lo tabata uno chikito pero e acogida tabata mas grandi di locual nan a spera. Un danki grandi na tur cu a presenta, aporta y kier a informa riba e evento cu lo bay tuma luga e dianan venidero.
Andrew Croes, miembro di e team ta conta cu nan ta consisti di hobennan hopi energetico y creativo cu plannan grandi pa yuda e deporte crece y ta contento di mira e sosten cu nan a ricibi na e prome evento organisa pa T’Real. Ta sigura cu esaki lo ta e prome di hopi evento mas na caminda y cu lo scucha hopi mas di T’real den comunidad y mas cu claro den e grupo cu ta practica e deporte aki.
Durante evento di diadomingo tabata tin benta di rifa y dialuna atardi a saca ganado. Pasashi pa compaña e delegacion cu lo biaha Corsou y como segundo premio un Island Jeep Tour. Pa e motibo ey a yega hunto na Jay’s Car Rental pa asina den forma transparente saca di e tombola e nomber di e ganadonan.
Ganado di e segundo premio, e Island Jeep Tour a resulta den nomber di Zhyonthdrick Dania ( Modanza #19 ) y ganado di e prome premio, kende ta e persona cu lo biaha pa Corsou cu e grupo ta Maria Lu ( number di ticket 003 ). Ta pidi tur ganado pa tuma contacto cu miembro di e team.
Un danki grandi ta bay na tur sponsor cu a brinda nan sosten cu sin nan hopi cos lo no tabata posibel manera Alvin Lacle, como tambe Jay’s Car Rental, Speed BodyShop, Sunrise Take Away y Carwash, Island Taste, Fix Building Transport, Race Painting y naturalmente tur miembro di T’Real cu a traha hunto y duro pa meta. Na e dos chefnan cu a traha un suculento lasagna como sopi pa asina haci di e evento uno sumamente exitoso.
