No ta un ni dos, sino ta cinco director caba a haya nan retiro asina, firma pa ing. Richard Eman, siendo presidente y alabes director di Utilities Aruba N.V. Despues di a “bula cabes” di cinco director, yiu di tera, profesional…a ora pa puntra si ta tur e directornan aki ta corupto, ta incapas of…si ta Richard Eman, politicamente apunta pa Gabinete Wever-Croes I mes por ta e problema. Tin biaha ta dificil pa imagina cu a opta pa nombra un arkitecto como e hefe maximo di ingenieronan cu ta maneha refineria, compania di awa, di coriente, etc. Entretanto, e balans di pago pa persigui y core cu e directornan aki ta core den miyones caba. E pregunta ta facil…ken ta paga? E contesta ta mas facil ainda: nos!
E prome tabata Ing. Robert Henriquez di NV Elmar cu a bay 31 di october 2018. El a bay cu un pakete gordo, pasobra no por a hustifica su retiro a base di su maneho of decisionnan. Den su caso, el a descubri fraude y un “shap den mi shap” den e compania estatal y ora a par’e y persigui e dos sospechosonan, Utilities Aruba N.V. a persigui e mes, dun’e un pakete p’e bay y a wanta e dos hacidonan di malo na trabou, manera nad’un pasa. Minister presidente a topa mama di Henriquez e tempo ey den port’i misa di Paradera y ora e mama a suplic’e pa no persigui su yiu pasobra e ta un profesional y e tin yiu pa cria, e mandatario a bras’e y primintie cu nada lo pasa cu su yiu. E mesun siman a ordena su retiro!
A sigui drs. Franklin Hoevertsz di Utilities Aruba N.V., cu tambe mester a bay na januari 2019 y tambe a bay cu un pakete color di oro. E si a yega corte y eyden hues a aproba su retiro berdad pero a honra e acuerdo di retiro ancra den su contract di trabou. Utilities Aruba a purba mal interpreta e acuerdo pero den un otro caso hues a sigura cu ta paga Hoevertsz delaster un cen cu ta coresponde na dje. Utilities Aruba a keda sin cumpli cu e sentencia e tempo ey, pa cual abogado mr. David Kock a laga tira beslag riba tur e cuentanan di banco di e compania estatal. Cu nan mannan mara, sin por haci ningun transaccion mas, e ora Richard Eman a doblega y cumpli cu sentencia di hues.
E di tres cu tabata cla pa bay tabata Alvin Koolman di Refineria di Aruba N.V., pero e no a duna Eman a honor ey y a dicidi di tuma su retiro su mes, e mainta riba dia cu e AVA mester a tuma luga pa dun’e su retiro. E tempo ey Richard Eman tabata convenci cu Koolman tabata mucho cerca di e gobierno anterior den e proceso pa reapertura di e refineria. A investig’e di tur forma, pensando cu posiblemente e lo tabata cobra “algo” den e deal di compra di combustibel pa benta local. A gasta un suma cuantioso na pago di tres diferente compania, incluyendo bufete di abogado Croes, Wever & Ruiz y di bufete di Gabri de Hoogd, pero sin por a yega na un conclusion. Na final e director, cu ta ruman di secretario di Conseho di Minister y ruman di candidato riba lista di MEP, a dicidi di tene honor na su mes y a kita di RdA y awendia ta ocupa puesto halto atrobe internacionalmente.
Mester menciona cu excepcion di Alvin Koolman, tur e otronan a sali gobierno, siendo doño di Utilities Aruba N.V., un suma cuantioso di placa. Awor a sigui Luis Oduber y Randolph Ruiz na di cuater y cinco luga.
E dosnan aki si lo no bay sin un “golden handshake”. Diabierna Oduber a firma su acuerdo di despedida mientras cu Ruiz ainda no ta di acuerdo cu locual Utilities Aruba a ofrec’e. Ta premira cu den fin di siman aki ainda lo yega na un acuerdo pa evita escalacion dialuna, casonan den corte y batayanan den media. Pasobra con cu bo bir’e, na final e lo bira un discusion politico. Ta keda e pregunta si e maneho di Utilities Aruba ta corecto, paga directornan sumanan cuantioso di placa pa nan bay, sin cu tin un motibo valido, pero costando clientenan di WEB y Elmar mas placa ainda!
