A combersa cu Kimberly de Cuba cu ta trahado social na Fundacion Telefon pa Hubentud (TPH). Un di e tareanan principal di e fundacion tin na su encargo ta maneha e conocido number di telefon 131.
Durante luna di april e representantenan di e fundacion ta bishitando diferente media na Aruba pa informa comunidad cu ta buscando boluntario.
TPH lo ta ofreciendo un training basico pa boluntario: E procedura pa por bin na remarca pa e training ta cu mester inscribi como boluntario of ta un boluntario activo di TPH. Durante luna di mei lo ofrece e training basico cu lo ta un total di 10 anochi, despues lo haci un “stage” di seis ora. Na momento cu completa e training basico y e “stage”, e boluntario ta bira oficialmente un mentor na TPH.
E mentor su tarea ta contesta e yamadanan cu ta drenta riba number 131 y como tambe ta “chat” cu tur e hobennan na Aruba, Boneiro, Saba y Statia. Ta atende yamada di 2:00 pm pa 6:00 pm. Edad minimo cu por bira boluntario ta 16 aña y no tin edad maximo. De Cuba a splica e motibo cu ta enfoca riba hobennan di 16 aña ta, cu pesar nan no tin “experiencia di bida”, pa medio di training ta zorg pa tin “tools” necesario pa guia otro hoben.
E representante a agrega cu hoben ta bay mas facil cu e sistema di “peer to peer”, debi cu edad cu e hobennan ta comunica entre nan ta mas cerca di otro na edad. Di e forma aki ta facilita e hoben cu ta contact 131 of via e “chat” di por tin un comunicacion mas habri cu otro.
E mentor pa TPH lo ricibi training basa riba 26 “module” (les). Despues di completa e training bo ta casi riba un nivel profesional diploma. P’esey ta yama nan mentor. E orario pa labora como boluntario na TPH lo ta minimo 2 ora pa siman, por scoge e orario cu lo desea di traha como boluntario, por scoge e orario di 2:00 pa 4:00 pm, of di 4:00 pa 6:00 pm. Semper durante orario cu e persona ta labora na TPH ta compaña pa un otro persona.
Tambe ta posibel cu por labora como boluntario “un siman si y un siman no.” Otro posibilidad ta si tin e personanan cu ta traha durante siman, por haci e funcion durante weekend.
