Riu Palace Aruba hopi biaha ta haci evento pa comunidad di Aruba, pero un biaha mas a topa cu e Fundacion Sea Bunita Sea Bo Mes. Pa di dos aña consecutivo Riu Palace Aruba a organisa e cena di Pasco cu e fundacion, cual a conta cu un participacion di mas di 20 mucha, kendenan tabata compaña cu nan representantenan.
Sandra Carson, Manager di Mercadeo Riu Palace Aruba, a expresa cu nan ta haci esey cu hopi satisfacion y ta spera cu por haci esey pa hopi aña mas. Pa por a organisa e comemento aki no tabata dificil, pero si tabata un reto. Esaki door cu mester a hacie cu mas protocol, pasobra pa nan ta un prioridad e siguridad y salud di nan cliente. Riu Palace Aruba a logra cu e protocol y tabata un satisfaccion pa mira e sonrisa y satisfaccion di cada miembro di e fundacion.
Un toke special cu a percura un biaha mas ta presencia di Santa Clause, kende a parti un regalito na cada cliente di e fundacion. Riu Palace Aruba ta desea tur hende un Bon Pasco y Feliz Aña nobo, pero tambe cu 2021 trece mas salud pa un y tur.
E fundacion ta gradici na Gerente General di Riu Palace Aruba cu pa di dos aña consecutivo ta habri porta p’e muchanan special. Marianela Geerman, secretaria di Fundacion Sea Bunita Sea Bo Mes, a splica cu e muchanan tabata contento pa ta eynan, pero tabata sa ki pa spera. Un biaha mas a sorprende nan cu Santa Clause, pero e cuminda y e trato ricibi ta uno fenomenal.
Door di e pandemia di COVID-19, e fundacion a topa cu retonan y pa nan esaki no tabata facil. Den luna di mei semper nan tin e show cu nan muchanan special, unda nan ta modela, red carpet. Nan no por a organisa e evento, pero si a scoge pa haci dos cena di Pasco. Geerman ta desea tur hende un 2021 yena di bendicion, potivismo, tin fe y cu poder di Dios tur cos lo ta diferente.
