Fundacion Movemento ta Bida tin un tremendo actividad specialmente pa personanan cu ta 60+. Nos grandinan por participa tur siman y traha den hofi. E actividad aki ta specialmente pa nos grandinan cu ta hopi isola na cas y alabes pa trece conscientisacion na e importancia di nos grandinan cu ta keda isola na cas, cual ta hopi malo pa nan bienestar.
Segun Rosa Leon, projectleidster di e proyecto Hunto Grandi, Grandi Hunto, e programa aki ta caminda cu tin diferente stakeholder, manera Cas Sjabururi. Tambe Santa Rosa y e departamento di Minister Romero. Ta creando un hofi pa 60+ unda cu tur lo bay cuminsa for di e basico di con pa cuminsa planta, te ora cu move esaki.
Kier crea un hofi caminda cu e 60+ por sinti nan mes ameno, ta crea contactonan social y alabes ta traha fisicamente.
E fundacion tin e tereno so. Awor aki ta buscando e participantenan cu kier, conhuntamente cu e fundacion, traha den e hofi, caminda cu por bin cu idea, sea cu e grandi mes ta haci hardineria na cas, etc. Aki tur hende por crea e hofi, a base di e necesidad y e ideanan di e participantenan.
Pa participa e persona mester tin experiencia basico den hardineria, mester ta den un bon estado di salud. Por traha independiente den solo, tin su propio transporte, mester tin e tempo disponibel for di dialuna pa diadomingo for di 6’or pa 10’or di mainta. Tanto hende homber como hende muhe ta bon bini.
Pa por inscribi por tuma contacto cu e fundacion na telefon 6419272 for di 9’or pa 11’or di mainta. Tene cuenta cu e cantidad di participante ta limita.
