Den Juan 15 vers 7 Hesus a duna nos un gran promesa el a bisa na nos lo siguiente: “Si boso keda den mi y mi Palabranan keda den boso, pidi tur loke boso kier y lo haci esaki pa boso.
Esaki ta pa tur esunnan cu ta kere den Dios cu un curason sincero y cu ta mantene un comunion cu Dios. Con bo ta mantene comunion cu Dios?
A. Door di bishita cas di Dios cual ta bo Iglesia
B. Haci oracion
C. Lesa bo Bijbel
D. Scucha e palabra y wak video cu ta contene doctrina sano pa bo crecemento spiritual, pasobra enseñansa falso ta purba na drenta. Comunion cu Dios ta yuda nos den guia di nos famia, caminda tin comunion cu Dios, ta dificil pa pleito y violencia domestico drenta, pasobra comunion cu Dios ta aleha tur locual ta contrario na e boluntad di Dios. Tin hopi cas caminda mucha ta rebeldia y mayor no por cu ne, hasta ta yega asina leu cu mester yama polis, nos tin di compronde cu ora bo mester yama polis pa bo yiu esey ta nifica, cu e situacion ta extremo y for di control, caminda no tin rasonamento, pa parti di bo yiu, of abo como mayor por a haci algo robes. P’esey Bijbel ta bisa nos y mi ta bolbe rectifica cu nos mester lanta nos yiu den e Palabra di Dios pa asina e mucha tin comunion cu Dios. Y asina evita mal influencia riba su bida. Comunion cu Dios ta aleha mal amistad, pasobra ora un hende cu tin comunion cu Dios, otro persona cu tin mal pensamento no ta asocia cu ne facilmente, pasobra su Spirito ta rechasa negativismo. Tin un beneficio hopi grandi ora nos mantene un comunion sincero y berdadero cu Dios, na Ingles nan ta Yam’e fellowship, pero den tur idioma e ta mustra cu nos mester tin comunion cu Dios. Pero esey tambe ta exigi tempo pa Dios, si bo telefon ta mas importante cu Dios, si bo television ta mas importante cu Dios, si bo chick of bo guy ta mas importante cu Dios bo no por tin comunion cu Dios. Si bo ta casa abo y bo esposa hunto mester tin comunion cu Dios pa asina Dios papia cu boso, con boso dos mester guia e famia. Den bida bo ta topa hopi caso caminda hende tin tempo pa tur cos pero hende no tin tempo pa Dios y ora hende bira malo, e momento ey nos ta core busca Dios, pidi oracion, yama tur conoci pasobra algo a sosode cu nos no por deal cu ne nos so. Hesus a bisa den Juan 15:7 kico nos mester haci. Papa Dios bisa den 2 Cron 7:14 kico su pueblo mester haci , pero con e pueblo por hacie si e pueblo no tin comunion cu Dios. Tin hopi cos cu ta hala nos for di e comunion cu Dios p’esey tene cuidao di ta fanatico di politikeria, pone tur bo atencion na hende cu ta priminti y sa masha bon cu locual nan ta priminti no ta alcansabel. Pero kier uza abo pa logra nan meta y despues nan ta cumpli cu nan propio agenda. Aki nan bo ta mira e diferencia entre hende y Dios, hende ta priminti cu nan lo bay haci tur locual ta posibel pa yuda bo, den un porcentahe hopi abao di exito, pero Hesus ta duna bo e siguridad bisando: Si bo permanece den mi y mi Palabra permanece den bo, pidi locual cu bo kier y lo mi hacie pa bo. Y esaki ta permanente y ta conta pa tur esunnan cu ta busca Hesus cu un curason sincero y asina tin comunion cu ne.
Rabia ta kibra comunion cu Dios
Envidia ta kibra comunion cu Dios
Falta di pordon ta kibra comunion cu Dios
Gañamento ta kibra comunion cu Dios
Idolatria ta kibra comunion cu Dios
Redo ta kibra comunion cu Dios
Falsedad ta kibra comunion cu Dios
Traicion ta kibra comunion cu Dios
Scoge pa bo mes na cual banda bo ta awe, bo kier agrada e mundo of bo kier agrada Dios, lesa Galationan 1:10 y asina bo tin cu busca comunion cu Dios urgentemente, pa bo hogar por tin paz y trankilidad. Por fabor no lubida pa haci oracion riba nos eleccion pa asina pone e futuro gobernacion di e pais aki den man di Señor. Y esaki tambe ta un motibo pa nos tin comunion cu Dios.
