Despues di basta tempo Fundacion Corector di Papiamento (FCP), antes Grupo Corector di Papiamento, ta bolbe organisa un anochi literario. E anochi tabata dedica na tres docente cu na aña 2001 pa 2002 a duna e curso di Corector di Papiamento.
Ta trata aki di Ramon Todd Dandaré, Mario Dijkhoff d.f.m. y Pedro Velasquez d.f.m. Como un gradicimento y pa recorda nan a duna un homenahe special na e personanan aki cu a haci asina hopi pa educa otronan riba e bon uzo di nos idioma Papiamento. Entre otro e grupo di Corector mes cu desde 2003 a organisa diferente actividad relaciona cu e bon uzo di nos idioma.
E anochi literario aki tabatin declamacion di poesia di Sergio Velasquez, yiu di Pedro, charla di Gregor Dijkhoff di Stichting Dijkhoff Papiamento Cursussen tocante trabou di su tata Mario, linguista y autor. Tambe tabatin un presentacion di Ramon Todd Dandaré, caminda a papia di e trabou cu nan a haci y a declama un poesia.
A conta tambe cu presencia di Linda Richardson cu a haci presentacion di su buki di terminologia den casonan penal den 3 idioma y conta un tiki mas di su motivacion y su plannan pa futuro. A mira benta tambe di diferente buki di Mario. Entre otro e diccionario/woordenboek Nederlands-Papiaments / Papiaments- Nederlands, Proverbio y Dicho di Aruba, Expresion, Gramatica di Papiamento, Terminologia Gramatical, Sinonimo y Reduplicacion, Papiamento un pa un. A reedita casi tur buki di Mario.
Glenda Reiziger ta presidente di e fundacion, el a conta cu tipo di anochi asina ta importante pa organisa y pa reconoce personanan cu tabata un baluarte pa nos dushi idioma, Papiamento.
