Aña 2017 tabata un aña exitoso pa Fundacion Amigonan di Archivo na unda por mira
atras riba diferente proyectonan cu a wordo realisa pa y conhuntamente cu Archivo
Nacional Aruba (ANA). Dia 18 di maart a haci apertura di e exposicion anual di ANA titula “Aruba ta nos tur” acompaña pa e Festividad Nacional riba e parkeo di ANA.
E Festividad Nacional tabata sumamente exitoso y a conta cu un cantidad record di bishitantenan cu a gosa di un dia yena cu ambiente, musica, baile y cuminda crioyo. Pa locual ta trata proyectonan riba tereno specifico di archivo, e aña aki a sa di realisa e compra di material di restauracion pa asina restaura un coleccion valioso di e Kerki Protestant di Oranjestad (aña 1822 – 2015) cu a wordo traspasa pa ANA. E archivonan dor di e añanan tabata den un estado hopi fragil y mester a wordo restaura. Cu e sosten financiero di Prins Bernhard Cultuurfonds Caribbean a logra cumpra e material y kimiconan pa asina e proceso di restauracion por a inicia. Ademas di a restaura e archivonan tambe a realisa un exposicion conhuntamente cu ANA y e Kerki Protestant di Aruba pa asina mustra e comunidad di Aruba parti di e coleccion y celebrando 2 siglo di Protestantismo. E exposicion su apertura tabata den e luna di oktober. Banda di esaki, tambe Fundacion ADA a financia e diseño y realisacion di e website pa Archivo Nacional Aruba: www.ana.aw, cu na e momentonan aki ya ta online.
Durante 2017 tambe fundacion ADA a haya e bon noticia cu e proyecto di Boy Ecury entrega na vFonds den cuadro di e “aña di resistencia” otro aña a keda acepta. T’asina cu Hulanda a declara e aña 2018 como e aña di “Resistencia” y a haci un yamada na instancianan pa entrega proyecto relaciona cu e tema aki.
Mirando e coleccion valioso na ANA di Boy Ecury, Fundacion ADA a entrega un proyecto, cu tin diferente aspecto e.o. un registro general di tur e material cu tin riba e tema, un guia pa investigacion, un exhibicion digital y un programa dirigi riba nos scolnan y hobennan. E proyecto lo inicia na januari 2018. E proyecto a wordo aproba como unico proyecto pafor di Hulanda. Banda di vFonds di Hulanda, parti importante di e proyecto tambe a wordo co-financia pa nos financiadornan local Prins Bernhard Cultuurfonds Caribbean y UNOCA Aruba. E proyecto tin un duracion di 1 ãna y lo wordo realisa conhuntamente cu ANA. Durante 2018 lo duna mas informacion di e proceso di e proyecto. Banda di esaki lo tin mas proyectonan durante 2018 y esaki lo wordo anuncia despues. Fundacion ADA kier a tuma e oportunidad pa gradici tur esnan cu den un forma of otro a contribui na exito di e Fundacion durante e ultimo 12 aña.
