Den forma basta rapido a haya resultado di e referendum cu a tuma luga bou di trahadonan di The Mill Resort. A programa e referendum for di 9’or pa 12.30 di merdia na oficina di Mediador di Gobierno Anselmo Pontilius. Eynan por a mira cu na final tabatin alegria riba cara di e trahadonan.
Sr. Tyrones Bremo, e vocero di sindicato Federacion Trahadonan di Aruba (FTA), a splica cu e resultado a mustra cu 43 trahado a haci uzo di nan derecho di voto y tur a vota na fabor di FTA. En realidad tabatin 61 persona cu tabatin derecho di voto.
Ultimo lunanan ta hayando basta demanda di companianan cu e trahadonan cu kier afilia. Esaki pa motibo cu tin companianan cu kier abusa di e situacion cu a surgi. E trahado ta hay’e cu e unico caminda cu e tin pa cana ta busca afiliacion sindical.
Bremo a splica cu ora trahadonan uni den grupo, tin mas forsa cu ora bo ta cana bo caminda bo so. Tin mas chens pa oprimi den un situacion asina vulnerabel.
E situacion di awendia, Bremo a splica, no ta facil. Semper ta trata di mira con e partidonan por yega na otro, evitando cu e trahado ta esun cu ta sali mas perhudica.