Antes tabata tin un organisacion yama Mambo, cu despues a bira Aria – prome cu esey gobierno tabata tin un organisacion cu a purba trece pa maneha y por tin miho comprension entre comerciante y gobierno. Actualmente e pregunta ta si tin un union of algo cu ta mara e comerciantenan of trece nan hunto pa papia cu gobierno y yega na areglonan. Segun comerciante den Caya Grandi, Frank Tieleman, algo asina mester bin pasobra aworaki no tin.
“Ami mes a draai cu Mambo pa 25 aña como vice presidente dus mi sa precisamente con e ta hinca den otro.” Mambo a stop pasobra ora a caba cu renobacion, gobierno a keda di bin cu un team di maneho pa maneha caya, pero esey nunca a concretisa.
E gobierno despues a bini cu e grupo di Aria, pero atrobe e no a funciona y trece e hendenan hunto. “Aworaki mi a ripara tin grupo di comerciante Pabao, cu ta bisa tin dos grupo – paso ta un caya nos ta dus no ta compronde dicon ta bisa cu esun ayabanda ta pensa diferente cu esunnan akibanda. Un no kier tram, otro ta bisa mester di tram. E ta un free-for-all cual ta haci e un problema grandi pasobra no tin union mes,” segun Tieleman.
E solucion ta keda den man di comercio y gobierno. “Mi mes ta tuma otro postura, mi a cansa. Mi a bisa mi ta bay traha pa mi mesun negoshi so y mi no ta bay yora ni gobierno pa nada. Pero como comerciante cierto cosnan bo mester conseho di parti departamentonan gubernamental.” Mester di DOW, DIP, permiso precario, mester sigui y no por scapa di esey. “Pero esey no kiermen mi ta sinta warda riba gobierno pa haci algo pa mi, ami mes ta zorg pa bin cu incentivo, haci mi eventonan,” segun Tieleman.
E ta haya si cu comerciantenan den Caya mester cuminsa traha y stop di warda riba un otro pa haci algo pa nan, e ora lo por bin un otro cambio, pero no por garantisa esey tampoco. Pasobra hopi comerciante ta den fase cu nan no por mas pasobra nada ta pasando y fondonan ta cabando.
