Plan di Mayor ta ofrece ayudo pa famianan durante y despues di un separacion, cu intervencionnan enfoca riba mayornan y intervencionnan enfoca riba e mucha, dunando e mucha un plataforma unda cu e por vocifera su opinion y deseonan.
Luna di april ta Luna Nacional di Conscientisacion Contra Abuso di Mucha. Abuso di Mucha ta encera diferente tipo di abuso manera, abuso fisico, abuso emocional, abuso sexual. Algun ehempel di abuso emocional ta; negligencia, abuso psicologico, abuso medico, y expone un mucha na violencia relacional. Efectonan di separacion tambe por tin entre otro consecuencianan ariba e estado emocional di muchanan. Durante un separacion por pasa cu mayornan no ta consciente di e estado emocional cu nan yiunan ta aden.
Plan di Mayor kier a introduci e siman di conscientisacion di efecto di separacion ariba muchanan. Entre e fechanan 15 di april te cu 19 di april 2024 Plan di Mayor lo pone foyetonan informativo ariba nos pagina di Facebook tocante e efectonan cu muchanan por experiencia durante un separacion cu por tin impacto pa bida largo. E foyetonan aki lo tin conseho pa mayornan por yuda nan yiunan durante y despues di e separacion. E foyetonan lo enfoca ariba e efectonan ariba muchanan di diferente edadnan di: 0-2, 2-4, 4-6, 6-9, 10-12, 12-14 y 14-20 aña.
Pa clausura e siman di conscientisacion di e efecto di separacion ariba muchanan, Plan di Mayor ta organisa un charla tocante Manipulacion Parental. Manipulacion Parental ta un forma di abuso dirigi na e Mayor cu daño emocional causa na muchanan y ta sosode hopi bes durante of despues di un separacion. E charla di Manipulacion Parental lo tuma luga na MFA Santa Cruz dia 19 di april 2024 di 6:00PM – 8:00PM y ta completamente gratis.
Plan di Mayor kier a invita pueblo di Aruba pa atende e charla y ta mas consciente tocante manipulacion parental. Por registra na: https://forms.gle/5hCkmHeyZEqeqagd8.
Plan di Mayor ta situa na MFA Santa Cruz na e di dos piso. Pa cualkier informacion por tuma contacto cu nos na e email di [email protected], por sigui nos ariba nos pagina di Facebook: Plan di Mayor Aruba. Si ta desea pa cuminsa cu e trayectorio di mediacion por registra via e webiste na www.plandimayor.org.
