Frakshon di MAN, meskos ku komunidat ku repudio a tuma nota di e insidente ku a tuma lugá unda un hóben a usa violensia kontra di hende grandi.
Niun forma di violensia, agreshon, abusu i maltrato ta akseptabel den nos komunidat. Ni kontra di mucha, hende grandi, pareha, kasá òf miembro di komunidat. Lástimamente nos ta bibando den un komunidat ku dia pa dia tin mas violensia i maltrato ta tumando lugá. Nos tur ta kòrda un insidente similar algun aña pasá kaminda a maltratá señor Benchi Leon q.e.p.d, ku a bin pèrdè su bida despues di maltrato ku e a sufri den un kaso similar ku esun di djaluna último.
Frakshon di MAN ta bai studia pa wak te kon leu por hasi adaptashonnan na nos Kódigo Penal pa imponé kastigu mas severo ora ta trata maltrato kontra di personanan di edat i den presensia di mucha. Frakshon di MAN ta spera ku outoridatnan kompetente lo baha ku man duru riba esun kulpabel i manda un señal bon kla ku e tipo di komportashonnan aki no ta keda tolerá ni akseptá.
