Benny: Sistema di PPP ta scapa gobierno gastonan di mantencion

Na momento cu partido AVP a drenta gobierno na 2009, keda sin haci algo den e desaster cu gobierno di MEP a laga e pais, no tabata un opcion y for di prome dia Gabinete Mike Eman a asumi su responsabilidad y c’un plan di gobernacion concreto y dirigi pa atende diferente desaroyonan negativo cu e pais tabata confrontando, a logra na desvia e rumbo negativo aki y percura pa un progreso sumamente positivo.

Parlamentario Benny Sevinger ta mustra cu esaki tabata posibel despues cu partido AVP den oposicion, a traha riba su vision pa e pais, studia diferente aspecto di vital importancia y con mester atende cu esakinan asina cu AVP drenta gobernacion di e pais.

Esaki contrario na loke e pais ta pasando aden na e momentonan aki caminda gabinete Wever Croes no sa mes kico pa haci, no tin un plan di maneho y no tin vision di kico ta bay pasa y ta depende aworaki totalmente di gobierno Hulandes, pa determina rumbo di e pais.

Segun ex minister Sevinger, partido MEP pa ocho aña largo a sinta den banki di oposicion gritando riba mega debe, sclamando cu e pais ta bancarota, oponiendo na tur loke ta bon pa pueblo y pa pais Aruba, no a duna ningun clase di sosten na cualkier decision cu Gabinete Mike Eman a tuma pa bienestar di henter comunidad.

Na  e momentonan aki ta bisto pa tur hende cu gabinete Wever Croes no tin e capacidad pa atende asuntonan di vital importancia di nos pais y solamente ta gasta su tempo valioso pa trata di desbarata y desgaba tur proyecto cu Gabinete Mike Eman I y II a ehecuta pa miho desaroyo di nos pais.

“Na momento cu ripara cu e gobierno aki ta trata di tur forma pa crea espacio pa trata di hustifica su decision pa introduci medida drastico cu aumento di BBO, esaki ta confirma cu e gobierno aki ainda no a caba di saca su som pa a base di su propio vision, actua den un forma creativo y percura pa solucionnan real cu tanto el a sigura pueblo cu e tin.

Na momento cu scucha gobierno uza proyectonan di PPP pa hustifica introduccion di medida contra pueblo, esaki ta bolbe demostra cu partido MEP nunca a sirbi interes di pueblo, y solamente a atende cu interes di famia-,  amigo- y sponsornan di campaña.

Contrario na gobierno di MEP den pasado caminda miyones tabata bay pa famia y amigonan sin cu pueblo a haya algo positivo al cambio, proyectonan di PPP a percura pa un miho desaroyo economico di nos pais, creando cupo di trabou y percurando pa entrada pa caha di gobierno.

Proyectonan cu pueblo ta haci uzo di nan tur dia, cu ta beneficia desaroyonan riba nos isla, tanto den e aspecto turistico, social y economico y cu a bira posibel dor di e sistema di PPP.

PPP no ta nada otro cu esey y mester paga esaki bek den 20 aña y e diferencia di esaki ta cu pais Aruba tin parti di mantencion den e proyectonan aki pa e periodo di 20 aña den e prestamo aki.

Otro proyectonan cu a wordo ehecuta den pasado no ta mustra cuanto pais Aruba tin cu paga extra pa mantencion di e proyectonan aki y tur otro gasto adicional cu esaki ta rekeri pero den e sistema di PPP e proyecto lo wordo manteni den diferente aspecto manera mantencion di e cartera, percura pa mantencion di luznan y matanan sin cu esaki lo costa pais placa extra.

Cantidad di proyectonan den pasado a conoce hopi contratiempo pa motibo cu dado momento e costo di mantencion  a bira di mas y esaki a pone cu e proyectonan aki a bira mas costoso pero den e sistema di PPP esaki ta totalmente diferente caminda e contratista tin cu sigui mantene e proyecto durante di e periodo cu gobierno ta pagando pa esaki,”  Parlamentario Benny Sevinger a declara.