Presonan ta bay cuminsa haya un telefon fiho den nan cel. Tambe nan lo por habri nan cel cu un yabi cu ta bay ta na nan disposicion. Autoridadnan a haci algun test caba cu e procedura nobo aki. Segun Minister Dekker (Hulanda) e cambio aki ta contribui na baha e presion riba e personal y mehora e sentido di siguridad di detenidonan y e personal.
Awo e detenidonan por haci yamada via di un telefon central riba nan piso, pero mester comparti esaki cu otronan. Segun Dekker, un telefon den cada cel ta trece mas trankilidad bou di e detenidonan, pasobra pelea riba uzo di e telefon central ta wordo evita.
E telefon den e cel ta funciona di e mesun forma cu esun central: detenidonan haciendo uzo di un codigo por yama y e tempo ta wordo limita. Cierto numbernan ta wordo desconecta of blokia. E telefon ta sigur y e combersacionnan por wordo graba y scucha bek.
Yabi
Cu detenidonan mes por haya un yabi di nan cel, ta haci cu nan por protege nan propiedadnan y evita robonan. E ta evita cu cada biaha un guardia mester cana bay cu un detenido su cel pa habri esaki p’e. Na e parti paden di e cel no tin e buraco pa uzo di yabi, pues e no por habrie di paden y cer’e bek.
Tanto e telefon propio como e yabi no ta valido pa e seccion di extra vigilancia den e instituto Vught, e seccion di teroristanan y e centro psikiatrico penitenciario. Ta bay introduci e medidanan aki den forma simultaneo den tur e otro prizonnan.
Tambe a haci experimento cu e momento di “luchten” pa laga e presonan haci esaki nan so, pero segun Minister Dekker, e no a demostra di ta baha e presion di trabou y mehora e siguridad.
