Recientemente Fracion MAS a tuma nota di publicacion di un rapport di e organisacion CARMABI cua haci un estudio riba nos coral rifnan na aña 2019. Ta trata datonan hopi importante di p.e. e calidad di nos coralnan, nos lama, e santo, e efecto di polucion cu tabatin y tin ainda riba nos naturalesa y riba henter nos sistema marino. Tambe a publica e efecto cu nos Riool Water Zuiverings Instalatie (RWZI) tin riba nos naturalesa, mescos e efecto di nos dump, sin lubida e efecto di nos refineria di antes y e efecto cu esakilo por a causa den riba desperdicio, nos lama y tambe nos piscanan.
Un topico hopi interesante cu no solamente ta toca nos naturalesa, pero tambe nos turismo, pa cual fraccion di MAS conhuntamente cu fraccion di Accion 21 a pidi un reunion publico den parlamento.
A manda un carta por medio di presidente di parlamento pa gobierno cu e deseo pa tres minister, den persona di Prome Minister Wever Croes bou di cual infrastructura ta cay, Minister Arends bou di cual medio ambiente y naturalesa ta cay, y Minister Oduber bou di cual salubridad publico ta cay, bin parlamento, pa haya sa kico ta nan pensamento riba e rapport aki y kico ta e plan di accion cu tin a base di e rapport aki, e sugerencia cu nan ta trese y e conclusionan cu nan ta saca, mirando cu e retonan di medio ambiente ta esunan di mas grandi cu nos tin al momento combina cu esnan di salud.
Sra Lopez Tromp a finalisa bisando cu ta sumamente pa e tres ministernan aki bin parlamento pa asina por haci pregunta y debati riba un rapport asina importante, no solamente pa turismo di Aruba pero tambe pa sa ki paso lo bai wordo tuma pa kita e efectonan negativo y di polucion riba nos naturalesa y nos medio ambiente.
Loading…
Reload document 
Open in new tab 
