Den combersacion cu Jeanmiree van der Werf, trahado preventivo di Fundacion Respeta Mi (FRM), e ta duna algun detaye di con ta e miho forma pa mayornan atende cu e muchanan cu ta na cas asina hopi largo debi na “shelter in place” causa pa presencia di COVID-19 na Aruba.
Ya ta un luna caba cu scolnan a cera, el a splica, y e cambionan, principalmente esnan mas chikito, ta hopi straño nan. Mas ainda si nan no ta compronde e motibo di e cambionan. Pa e motibo aki ta importante pa mayornan keda den comunicacion continuo cu nan yiunan, grandi y chikito, riba e aspecto di proteccion pa nan mes y otro hendenan.
Specialmente den e momentonan dificil aki, ta concentra hopi riba proteccion di muchanan di abusadonan. Den esaki bisiñanan tambe ta hunga un rol importante y kico un bisiña por haci ta keda ilustra riba e poster cu nan a saca recientemente. Cu e cambio, un bisiña por yuda hopi. Kisas si mira un papel cora, e ta nifica cu e mester di ayudo. Por ehempel papel ta oranje, e bisiña mester di ayudo pero no ta urgente.
Kisas por yama e bisiña y puntra ki ayudo e mester di dje. E por tin di abuso, of kisas, e no por haci compras, pone cuminda pa su cacho, etc. Esaki ta un bon forma con bisiñanan por yuda otro.
Van der Werf a bisa cu e colornan no necesariamente ta papia di solamente di abuso pero e por ta pa otro tipo di ayudo. Na momento cu yama, kisas si no tin contesta of scuchanan cosnan straño, e por ta algo serio y den casonan asina por contact autoridadnan. SI tin duda den caso di abuso yama Bureau Sostenemi na 5881010 pa conseho riba e siguiente paso pa tuma.
Tambe FRM tabatin algun tips di e forma pa anda of crea un rutina nobo na cas, unda cu nan ta constantemente na cas. Y mayornan ta hunga un rol importante den esaki. FRM mester por yuda mayornan pa crea un rutina, cu ta percura pa e muchanan ta mas trankil.