Durante e reunion publico cu a tuma lugar recientemente den Parlamento encuanto COVID-19 Parlamentario Shailiny Tromp-Lee a trata su preocupacion encuanto e influencia cu COVID-19 tin riba nos bida social y familiar. Tromp-Lee ta enfatisa cu nos tur mester ta consciente cu toke de queda, shelter in place, combina cu distancia social y scolnan sera tin un impacto enorme riba nos bida. Pesey mes nos no mester perde di bista e crisis social cu ya caba nos pais tabata aden y cu mendiante di Social Crisis Plan Gobierno actual a bin ta duna atencion dirigi na esaki.
Durante rueda di prensa Directora di Dept. di Asunto Social, Sra. Hernandez, a informa cu mundialmente ya caba ta mira cu violencia domestico a subi cu 30% y cu na Aruba tambe segun sra. Hernandez nos ta cuminsa mira cu e casonan ta subi. Segun Tromp-Lee esaki sigur ta un aspecto hopi preocupante.
Famianan mas y mas ta henter dia hunto, ya caba pa 1 luna. Esaki segun Tromp-Lee sigur ta trece su reto cu ne pa hopi famia. Pero nos no por perde for di bista e famianan cu prome cu COVID-19 ya caba nan situacion na cas tabata delicado of problematico. Awor e situacion cu mayornan a perde entrada, y cu nan tin hopi inseguridad y ta sinti angustia, intrankil y miedo, esakinan tin un impacto aun mas grandi y por empeora e situacion na cas door cu nan por proyecta esakinan riba nan famia.
Pesey mes Tromp-Lee ta indica cu e ta hopi conciente y preocupa pa e impacto social di COVID-19. Durante e reunion encuanto COVID-19 Tromp-Lee a urgi Gobierno pa bin cu un maneho dirigi specialmente riba con pueblo, con nos famianan mester y of por deal y reacciona riba e retonan cu nos ta presenta diariamente cu ne. Na mes momento Tromp-Lee ta menciona cu Gobierno por bin cu un programa pa duna nos hendenan e toolsnan necesario pa por regula nos emocionnan. Gobierno tin un tarea importante pa duna guia y sosten.
Tromp-Lee ta bisa cu e sa cu ya caba tin cierto proyectonan ta tumando lugar caba. Ta bon pa Gobierno bin cu un maneho integral y dirigi pa atende specificamente cu e situacion special aki di COVID-19. Tromp-Lee ta aplaudi e iniciativa di Seccion Bida y Famia di Dept. di Asunto Social conhuntamente cu Multidisciplinair Centrum y algun personal di Respaldo pa a bin cu e hotline SALUD MENTAL pa tur persona cu ta sinti stress, miedo, ansha, preocupacion etc. E number ta 2810909. Nan psicologo y terapistanan ta cla pa scucha. Tromp-Lee a haci un apelacion na Gobierno pa trece na conocemento di pueblo con nos ta bay yuda esnan cu ta yama e hotline aki y cu ta rekeri mas cu un ‘luisterend oor’.
Banda di e problema di violencia domestico tin e problema di pobreza y e grupo grandi di famianan cu lo bay cay den un necesidad grandi. Awor mas cu nunca constantemente Gobierno mester informa pueblo di e posibilidadnan di yudansa, asistencia y guia. Awor mas cu nunca banda di gobierno, nos tur mester ta solidario cu un famia, amigo of persona cu ta den necesidad. Saca man y yuda otro!
Pueblo mester realisa cu pa bo pidi ayudo no ta un acto di debilidad y of di cobardia. Mas bien e ta uno di forsa y grandesa. Yama y pidi ayudo pa bo mes of bo famia. Tromp-Lee ta enfatisa cu cos no lo ta mescos mas por lo pronto pa ningun di nos. Ni pa Gobierno, ni pa comercio ni pa sindicalistanan y sigur no pa e clase trahado. Pesey mes e ta haci un apelacion fuerte na henter comunidad pa nos uni y mustra responsabilidad en conhunto y mas cu tur cos ban nos tur ta positivo y solidario. Cu fe den Papa Dios e ta convenci cu hunto nos lo sali di e crisis aki tambe.
