Diabierna anochi alrededor di 10:00 pm polis a presenta cu maximo cu urgencia na Saliña Cerca 23K. Aki ta caminda cu polis a topa cu un fiesta clandestino. A topa cu varios hoben y mucha den e area. Segun informacion, un promotor a bende varios ticket cu algun nomber di “artista”.
A priminti e cumpradonan cu lo tin open bar y cu cierto artista lo presenta. Na dado momento un di e artistanan a presenta y e promotor a bis’e; cu e no mester presenta mas y cu e no ta bay pag’e tampoco.
Ey tur cos a cuminsa. A start un discusion formal cu a termina cu tirament’i piedra y hasta kier a cende e cas na candela. Tabata papia di hasta arma di candela envolvi. Ta tur motibo pa polis di Noord, strand y hasta Playa presenta pa atende cu e situacion. A detene dos persona, no a topa cu e arma di candela tampoco.
Na dado momento varios persona a cuminsa bandona e cas cu boter di alcohol den man, estilo “fiesta a caba.” Ta trata di un cas di huur, tanto tereno y e cas mes ta uno grandi cu a percura pa tur e personanan pasa un bon rato na e cas. Parce ta trata di e artista “Gasa”, cu e keda sin canta despues di uza su nomber pa haci promocion pa e fiesta.
