Diadomingo awor 1 di juli, piscadonan di Aruba ta celebra nan dia na Centro di Pesca Hadicurari ofreciendo pueblo di Aruba un tremendo torneo di pesca combina cu dia di famia y un festival di cuminda di lama pa kita sombre.
Un lista largo di platonan sabroso, dushi y crioyo ta warda bo bou di e diferente tentnan aya canto di lama na Palm Beach na Berea di Piscado cu ta keda entre Holiday Inn y Marriott Surf Club. For di 11’or di mainta un y tur ta bon bini pa saborea e delicianan prepara door y pa nos piscadonan na prijs di famia mientras ta warda botonan yega cu captura pa despues bende cu publico ey mes.
Riba menu tin: frekedel, kerikeri, cabrito stoba, sopi carni, surf and turf consistiendo di cabaron, lobster, escargot y lomito, un plato di choriso, galiña, lomito y rebchi, sopi oester, sopi seafood, croket di calco, paella, pisca hasa y gesmoor, galiña stoba, sopi di pisca. Chucheria, pasaboca of bocadushi tambe tin y lo tin awa di coco y raspao.
Lo tin ambiente cu musica di DJ “ora pa balaidores” y ta cera e atardi cu musica bailable door di e banda di momento esta JEO 297.
E torneo di pesca lo bay ta parti den dos categoria.
Categoria Crioyo/Tradicional, pa botonan cu un largura te 26 pia, lo pisca na manera tradicional, pues no mag di usa winch sea manualm hidraulico of electrico, rod and reel, tampoco palamber, reda, canaster, speergun y otro methodonan cu no ta valido den torneonan di pesca y cu un maximo di 3 participante den boto.
Categoria “Open” akinan botonan por ta mas largo y mag di usa winch sea manual of electrico, rod and reel, pero no palamber, reda, canaster, speergun y otro methodonan cu no ta valido den torneonan di pesca.
Botonan por participa na e torneo cu maximo un capitan mas cuater piscado.
Premionan lo ta pa mayor kilahe(pa cada categoria)
1.lugar lo haya un plakaat mas Afl.750,- cash.
2.lugar lo haya un plakaat mas Afl.500,- cash.
3.lugar lo haya un plakaat mas Afl.300,- cash.
Tambe lo bai tin premionan extra cualnan ta:
Mayor Conofes un plakaat mas Afl.150,- cash
Mayor Djampou un plakaat mas Afl.150,- cash
Mayor Mulato un plakaat mas Afl.150,- cash
Mayor Picuda un plakaat mas Afl.150,- cash
Mayor Pishiporco un plakaat mas Afl.150,- cash
Mayor Carpitan un plakaat mas Afl.150,- cash
Mayor Dorado un plakaat mas Afl.150,- cash
Mayor Pargo Cora un plakaat mas Afl.150,- cash
Mayor ehemplar di torneo un plakaat mas Afl. 250 cash
Boto crioyo cu mas kilahe un plakaat mas Afl.500,- cash
Mas cu claro, mientras ta celebra dia di piscadonan actual tambe lo dedica atencion na baluartenan.
Diasabra awor 30 di juni pa 8’or di anochi na Nos Clubhuis na e di dos piso di Hadicurari lo tene e “captain’s meeting” na unda lo repasa e reglanan di e torneo di pesca y prepara e delaster detayenan hunto cu e participantenan.
Pues tur loke falta ta bo persona pa purba esakinan. Un y tur ta bonbini.
