Abogado mr. David Kock a defende e Director di Departamento di Salubridad Publico, drs. Jerry Staring, den un caso sumario cu el a entama contra Gobierno pa su suspencion. Segun Abogado mr. Bryan Coffie cu a defende Gobierno, no ta trata akki di un suspension, sino a hal’e un banda un rato, mirando cu ta haciendo un investigacion. Abogado Kock a splica esakinan ta wega di palabra. Formalmente por ta tin rason di bisa cu e no ta un oficieele schorsing, pero cu na final e ta bin riba e mesun punto. Esey ta bira e forma di opera, esta cu prome ta duna un toegangsontzegging.
Dicon?
Hopi biaha un Hues ta hopi cuidadoso pa tuma un decision di toegangsontzegging pasobra ta duna Gobierno tur espacio pa haci su investigacion. Esey tambe nan ta limit’e prome na seis siman y extende cu seis siman mas. Pero ta ripara cu e modus operandi ta bira, pa uza esey y despues di esey, e oficieele schorsing mes ta bin. Masha poco ambtenaar, hoofd van dienst ta djis haya un toegangsontzegging y despues cos ta normalisa atrobe.
Con a cuminsa?
Tin di compronde cu tabata tin cosnan no mucho sigur cu no por a pone dede riba dje. Segun Kock, ta un di e preguntanan cu defensa a haci, kico ta e base. Tur e cos aki a cuminsa door di un blog di noticia, E Arubiano, cu diabierna awo tambe lo ta dilanti Hues pa responde pa nan publicacion. Abogado Kock a splica cu loke a wordo publica, siguramente e cliente ta desmenti totalmente. Pero esey eigenlijk tabata e base y e ta haya su origen den un empleado cu tabata keda ripiti cierto cosnan cu supuestamente lo a bay fout den e afdeling eynan. DRH mes cu tabata envolvi, semper na e directie aki mes, no a haya ningun base pa esaki y tambe por wak un desaroyo un tiki peligroso, caminda cu vooral ora cu ta mira cambionan di gobierno, por ta un grupo di ambtenaar, diripiente ta cuminsa crea un sorto di disturbio contra di un director y e decision e ora ta cay cu e director tin cu bay. Bo ta wak’e den mas departamento y no ta kere esey ta un bon desaroyo dentro di e ambtenarij.
Algo orkestra
Kock ta sigui splica cu ta trata aki di un trahado cu a cuminsa tur cos. Diabierna esaki ta bin dilanti. E ta un ripiticion y pesey mes e cliente ainda ta den un incertidumbre pasobra ta keda na kehonan, generalisa, sin contenido, cual e ta disputa completamente.
Acusacionnan
Nan a keda na cosnan en general durante e caso. Djis keda ripiti cu tin keho. Staring no tin ningun sorto di autoridad pa dicidi. A bin di kehonan cu hendenan no ta contento cu nan bevordering of cu formatieplan. Esey director no tin ni e autoridad pa haci. DRH ta deal cu esey. Tambe cierto decisionnan hasta ta gobernador tin cu firma p’e. No ta director tin cu culpa. Ta kehonan infunda.
Kico lo bay pasa
A pasa seis siman mas cu el a hala di su cargo. Ta urgente pa tuma un decision. Segun Kock, e cliente esaki ta toch un difamacion. Tur hende ta pensa cu berdad e director aki a haci algo fout. Pesey no kier a sinta warda djis pa bay warda kico ta bay pasa y dia 6 di Juli hues lo tuma su decision riba dje.
Minister Dangui Oduber
Lo ta na su luga pa e Minister hala su palabra aden si mester sosode cu e sospechonan ta infunda. Pero loke ta dañino pa e cliente, cu si kier a haci’e mes, no mester dun’e tur un sorto di un espectaculo mediadico pa haci’e. Mas ta daña e persona su nomber di e persona inecesariamente.
Caso di diabierna awo
Abogado Kock, a splica cu dia 6 di Juli, cual ta riba un diabierna, hues ta dicta sentencia. Pero diabierna awo tin e caso cu e cliente a cuminsa contra di E Arubiano cu a aparece riba e website ya menciona, cu ta origen di tur e problematica aki.
Redashi
Esaki mas bien ta wordo considera como declaracionnan sin fondo. E cliente no ta participa na redashi. Riba esey no por duna un comentario.
Tempo lo conta si esaki lo wordo considera como un persecusion politico.
