Lindy Lifestyle Boutique ta bay cera. Esey ta un echo. Lindy Croes, propietario di e negoshi, a conta cu Lindy a cuminsa hopi chikito den su camber na cas di su mama, como seis pa shete aña pasa y pocopoco a logra bay den nan prome luga y cu finalmente desde 2019 nan ta na Antraco Plaza, pero lastimamente lo bay ta den nan ultimo siman.
P’e motibo aki mes Lindy Lifestyle Boutique lo bay cera, y tur cos lo ta na 50, 60, 70, 80 y tambe 90%, ya cu nan tin un siman so. No perde e chens aworaki, cu tur cos ta na prijs di baca flaco.
Tambe Lindy a conta cu e ultimo coleccion, cual e no por a cancela, a pone nan na prijs sumamente increibel p’e por bay di biaha.
UN TRAYECTORIO BUNITA
Segun Lindy, henter e trayectorio tabata bunita. Fo’i cuminsamento te cu awo, hopi hende ta pensa cu por ta e ta tristo, pero ta un parti di ta un entrepeneur. Tin luga ta keda pa hopi aña ta existi. Pero den e capitulo aki, el a keda 6 aña.
Lindy no tabata sa absolutamente nada, ni tabata sa kico ta wholesale. Asina ey el a bin bula aden negoshi y a siña masha hopi mes. El a cuminsa busca su pañanan na Los Angeles, na Breda, na Colombia y aworaki por ultimo, e coleccion cu nan a haya siman pasa tabata di Italia y Paris.
Lindy Lifestyle Boutique semper a bende pa size regular y plus-size. Nan tin ta bende di x-small te cu 6 xl. Ta bende paña pa gym, pa sali, pa trabao. Nan tabatin tambe e marca Leonisa. Tambe nan tin sapato. Hasta ultimo nan a bin haya Steve Madden, cual Lindy ta hopi orguyoso di dje.
Tambe nan ta bende makiyahe. Fuera di Lifestyle, nan ta bende buki, suplemento, CBD, acesorio y asina e por sigui conta.
CAUSA DI E CERAMENTO
Lindy a elabora riba algun reto grandi cu nan, como compania y tambe e por a pensa 99% di e comerciantenan na Aruba ta pensa mescos, ta bira casi imposibel pa un comerciante na Aruba traha legalmente door di asina hopi negoshi ilegal cu tin actualmente. E ta crea un molester p’e negoshi cu si tin cu paga accountant, huur, coriente, belasting tur caminda y tambe otro gastonan cu tin, cual e otronan no ta paga. Esey ta un di e retonan cu tin den retail aworaki.
Lindy ta sigui conta cu pa ta un entrepeneur y doño di negoshi ta hopi dificil. E no ta imposibel si, cual no ta nifica cu e lo stop. Lindy lo bay tin un otro negoshi si. Pero aworaki e ta hopi mas consciente y como un doño di negoshi/entrepeneur, ta siña ta resiliente y busca otro manera pa haci e negoshi cu cada biaha ta bay bin un otro regulacion, un otro ley, otro cos cu ta traha den nomber di comercio, cu esunnan cu ta trah’e mes no tin experiencia den e industria of di ta un comerciante.
ULTIMO CAPITULO
Lindy a comenta cu nan lo tin un siman so habri. Loke e kier a bisa tambe na henter pueblo di Aruba y tambe esunnan cu a bin di afo un danki di curason cu for di mas di seis aña pasa a sostene for di e prome dia, a kere den dje. Lindy a yuda hopi hende tambe. E empleadonan tambe a yuda hopi hende hayando nan estilo, nan ‘fashion’ y tambe tur locual e oportunidadnan cu no ta relaciona cu e industria di moda, cual Lindy Lifestyle a trece. Na esey Lindy ta sumamente gradicido.
PROXIMO PASO
Semper lo bay keda cu e website. Tin lindyboutique.com. Hasta el a pensa pa haci un pop-up bek na december. Pero como cu tin otro proyecto den tapara ta mira si esey ta posibel durante e temporada ey si.
