Diamars mainta a sali un delegacion di Aruba rumbo pa Bogota, Colombia. Ta trata di un delegacion consisti di comerciante, departamento economico, consehero, prensa di Aruba y na cabes; Minister Geoffrey Wever. Ta trata di un mision comercial cu lo tuma luga e proximo dianan aki den e ciudad capital di Colombia, esta Bogota. Na nan yegada, por lo menos e minister y su conseheronan a ricibi un caluroso bonbini for di e embahador di Hulanda na Bogota, esta Señor Ernst Noorman. Na Aeropuerto Internacion El Dorado a ricibi e delegacion pa djey invita nan pa nan prome “business lunch.” Ey e embahador a conoce e delegacion diplomatico di Aruba un poco mas di cerca y na su turno, e hefe di delegacion, Minister mr. Geoffrey Wever a splica riba su intencionnan pa cu e mision comercial aki.
Probechando cu Minister Wever ta na Bogota, e embahador a invita e minister pa compañ’e na un exposicion di Aruba y Corsou titula “20 objetos de Aruba y Curacao” , den e bario di La Candelaria. Den e exposicion a splica un poco riba e historia tanto di Aruba pero tambe di Corsou. Na e exposicion por a aprecia entre otro e viool di Mo Tito, kende ta e welo di Maybeline Arends-Croes. Adicional, como un bon Rubiano, e mester a sinti e necesidad di splica e embahador un poco tambe riba e importancia di Dande pa Aruba. E exposicion aki, esta ’20 objetos de Aruba y Curacao” lo biaha rond Colombia p’asina laga e pais conoce un poco mas di Aruba.
Tin cu remarca cu no ta mucho dia pasa cu Minister di Cultura, mr. Xiomara Maduro tambe tabata na e mesun sitio na Colombia pa bishita e exposicion aki. Ni algun dia despues, Minister Wever tambe ta ricibi e oportunidad pa bishit’e. E diferencia ta cu; ta nota cu Wever a biaha den un “setting” mucho mas serio cu su colega Xiomara Maduro. Tin henter un agenda pa su bishita na Colombia y den tur claridad, cu prensa di Aruba presente. Claro, Headlines Group kende ta e cas editorial di 24ora.com y Trempan tambe ta forma parti di e delegacion y ta importante pa informa Aruba riba e trabounan cu e mester lo haci e dianan aki pa Colombia. Ta invita comunidad pa keda pendiente riba 24ora.com p’asina ricibi tur informacion relaciona cu e mision comercial cu ta tumando luga na Bogota, Colombia.
Tocante Geoffrey Wever
mr. Geoffrey Wever a caba V.W.O na Colegio Arubano y despues a studia na VU Amsterdam, prome como notario y despues como fiscalista, pues den leynan di belasting. Su experiencia laboral a start como fiscalista na Sprigthoff na Hulanda. Ora el a yega Aruba el a traha como abogado na bufete Croes, Wever & Tchong te na aña 2014. Despues el a cuminsa duna les na Universidad di Aruba den e facultad financiero-economico, riba derechonan comercial. Tambe den e facultad di ley y proceduranan civil. E tabata partner den e bufete di abogado De Cuba Wever Attorneys at Law. Durante e ultimo eleccion parlamentario na aña 2021 el a logra no menos di 1430 voto individual. Wever tabata number 2 riba e lista di RAIZ, kende a forma Gabinete Wever-Croes II hunto cu partido MEP. E ta minister encarga cu entre otro, Asuntonan Economico y Comunicacion y Desaroyo Sostenibel.
