Delegacion di Aruba tabata presente e siman aki den Zona T na Bogota, unda cu a organisa un evento special relaciona cu e proximo concierto di e Rey di Bachata Romeo Santos na Aruba.
Promocion di e grandioso concierto aki ta tuma luga internacionalmente, mirando cu e ta un proyecto cu ta carga apoyo di Aruba Tourism Authority.
E campaña di promocion di e concierto di Romeo Santos pa dia 9 di december awo, lo wordo haci na Colombia, Peru, Chile y diferente isla di Caribe.
Den e campaña pa atrae bishitantenan Colombiano den e fin di siman cu e Rey di Bachata lo ta presentando, a tene un conferencia di prensa bon acudi.
Larissa Bermudez, PR di Romeo Santos Concert Aruba, tabata presente na Bogota, kende tabata entusiasma cu resultado di e conferencia aki organisa hunto cu Oficina di Turismo di Colombia. “E tabata un concepto un tiki diferente, mas intimo y mas informal, por a hiba combersacion cu diferente periodista. Y no solamente riba e concierto di Romeo Santos pero riba Aruba en general,” Bermudez a conta.
A pasa hopi informacion di Aruba durante e encuentro cu prensa Colombiano.
Pa casualidad, recientemente Romeo Santos tabatin un concierto na Medellin, unda cu miles y miles di persona a asisti. A splica cu na Aruba no tin un stadion of Arena grandi cu ta acapara algun dies mil persona. P’esey no solamente e Colombiano por disfruta di algun dia di vakantie na Aruba, pero disfruta di un concierto di Romeo Santos den un “setting hopi mas personalisa”. Loke cu paga pa un ticket general na un stadion na Colombia ta hopi mas leu for di e escenario, cu loke cu nan ta bay experencia dia 9 di december na Aruba. Aki nan por mir’e hopi mas cerca den e seccion general. “E ta manera un experiencia VIP,” Larissa Bermudez a conta.
Un cara conoci den e presentacion na Colombia tabata e director di Aruba Tourism Authority su seccion di Latino America, Jordan Schlipken Croes. E tabata impresiona pa e encuentro realisa na Colombia. Esaki pasobra e concierto aki no ta solamente pa localnan por disfruta di e musica di un artista di taya mundial manera Romeo Santos, pero tambe e enfoke ta pa haya turista for di e mercado Colombiano. “Nos ta kere cu e Colombianonan tin e interes di combina un concierto cu bishita na algun di e miho beachnan. Esaki ta bay ta un bon oportunidad. Nos ta hopi contento y ta mira oportunidad na otro paisnan manera Peru y Chile.”
Durante henter e campaña ta purba posiciona Aruba cu e miho lamanan di mundo y un diversificacion di gastronomia. “Aruba tin hopi mas di ofrece cu solamente lama y su hendenan.” P’esey a invita e periodistanan cu ta esunnan top di Colombia pa disfruta di un cena y combersa cu nan riba tur loke Aruba tin di ofrece. Durante e evento a rifa un ticket, estadia y entrada pa e concierto bou di e periodistanan.
Colombia ta hopi conoci pa dianan puente. Esta e dialuna, despues di un dia festivo ta bira liber. Asina nan tin como 20 dialuna (den aña) liber. E Colombiano por subi un avion diabierna anochi, y pasa un fin di siman na Aruba pa bolbe nan pais riba dialuna.
LATINO AMERICA
Pa loke ta e mercado di Latino America en general, Jordan Schlipken Croes ta sinti cu e resultadonan ta “super bon y nos ta satisfecho cu e resultadonan.” A enfatisa cu tin crecemento na diferente pais, manera Colombia, Brasil, Argentina, Chile y Peru. Pronto tin un vuelo inaugural di Latam Airlines, cu lo habri e posibilidad pa crece den otro mercadonan. E ta habri hopi mas porta, segun e ehecutivo di turismo. “Esaki ta e comienso di mas crecemento. Aworaki tin un crecemento di 22% riba nan cifra di 2019 (cu tabata top caba). Pero 2024 lo bay ta ainda mas fuerte.”
