A yega e ora pa e gobierno aki baha for di pedestal cu nan ta riba dje. Tempo cu partido MEP tabata den oposicion nan tabata tira lodo riba tur hende paso nan nunca a haci nada malo. Awor nan kier biba den cashi glas y haci comosifuera cu nunca nan a kibra un copi.
Pueblo ta sinti cu nan a perde tur trankilidad cu nan tabatin y cu nan nivel di bida a bay drasticamente atras. Despues di e sla di awa y electricidad y riba dje cu e cobransa riba remedi di parti di AZV, awa a pasa hariña. Bo ta sinti e grito di pueblo cu no por mas. Gobierno ta sigui pensa cu nos pueblo ta pasivo cu nan lo por sigui suta pueblo cu medida.
Den 5 aña di gobernacion e gobierno bou signatura di e partido comunista MEP no a cumpli cu nada cu el a compromete su mes durante campaña. Nan plan di gobernacion ta simplemente medida pa pueblo y pa nan fiesta, auto nobo y biaha den primera clase. Awor cu gobierno su lomba ta contra muraya ta forsa pa introduci medidanan di landspakket. Den pasado nan a destrui parlamento pa via di e ley di LAFT, awe nan a haci pio cu e CFT ora cu a biaha scondi bay firma dia 13 di november 2020 entregando nos autonomia.
Dia 30 di maart 2021 prome minister a bay gobernador pa entrega retiro di su gobierno pa via cu su partner di coalicion esta parlamentario Howell a haya su mes cu problema cu husticia. Awe tin problema den su mesun seno pero te ainda no kier move un dede pa bay gobernador. For di aña pasa 1 di mei 2021 nos prome minister a haya un e-mail for di Arubahuis di e fiesta cu tabata tuma luga cu placa di pueblo. Arubahuis ta resorta directamente bou di mando di nos prome minister.
Hopi biaha nos por a tende den prensa cu e no ta na altura. Semper e ta keda bira rond di e asunto pa no contesta. No ta por nada el a haya diferente apodo. Prome minister ta bisa cu e rapport di Central Account Dienst no ta cla pero nos sa cu e no ta papia berdad. E votadonan di MEP ta cansa cu tanto corupcion ta pasa bou di wowo di nos prome minister y cu nada no ta wordo haci pa stop e corupcion. P’esey a cuminsa saca e paña sushi riba caya pa tur hende mira.
Coalicion den Parlamento a busca moda di tapa e desaster di minister cu tabata encarga cu Asunto Social den e caso di fase y loonsubsidie. Crisis Team tambe ta un otro desaster. CAFT ta pidi un ‘doorlichting’ den Dr. Horacio Oduber Hospital pasobra ta hinca miyones di florin di pueblo den un proyecto cu ta manera un bari sin bom. Esaki ta sin conta e contract scondi di Eagle LNG y awor kier haci mesun cos e proyecto di Molina di biento. Sin conta e directornan di WEB cu a manda cas cu ta costa miyones di florin di placa di pueblo. Y ainda gobierno kier bin cu 38 medida mas riba lomba di pueblo. Gobierno ta kere cu pueblo lo sigui manda abou e desaster cu gobierno a hinca pueblo aden.
Nos di partido Curpa ta kere cu a yega na un punto cu dialoga cu gobierno ta imposibel. Nos pueblo mester di un solucion mas pronto posibel. Si nos tur keda sinta man crusa nada lo pasa y nos tur lo tin cu biba den e miseria aki causa pa e gobierno. Partido RAIZ tin e cartera di integridad pero nan no por papia di integridad paso nan ta complice di tur locual cu ta pasando.
Nan a laga partido mep pasa nan un fastball cu e carteranan. Locual cu ta resorta bou di cartera di RAIZ ta dump di Parkietenbos, Post NV, Serlimar y Arubus. Parce cu nan no ta nan pero nan ta sigui ehempel di nan si paso den Arupark tin caranan nobo ta cana pega sticker riba autonan den centro di Oranjestad. Pueblo no por mas p’esey gobierno mester bay cas. Dios ta laga tur cos sali na claridad. Gobierno a sembra inhusticia y awor nan mester bay paga pa tur inhusticia cu nan a comete. Nan ta sinti cu nan ta dios y ningun hende por bisa nada.
