Fundacion Arubano pa Visualmente Incapacita (FAVI) tabata tin un siman basta druk su tras, den cuadro di e celebracion di siman di conscientisacion pa cu e hendenan ciego y/o problema visual.
CONSCIENTISACION
Diabierna nan a clausura e siman c’un salida den Arubus, unda cu nan tabata tin tres diferente punto di salida for di Oranjestad y Santa Cruz, hunto cu ocho di nan clientenan. Sary Wernet, trahado di FAVI, a comenta cu algun di e clientenan ya caba tabata tin experiencia den uzo di transporte publico, unda cu nan a expresa di tabata hopi aña pasa cu nan a subi un bus. Pero tambe tabata tin algun di e clientenan cu nunca a subi un bus, ya cu uzo di transporte publico ta dunanan miedo, pa diferente motibo. Nan a vocifera esakinan cu e personal di Arubus, unda cu a indica kico ta e miedo, si por ehempel e stepnan di e busnan ta mucho halto, e asistencia di e chauffeurnan cu a keda pendiente. E reaccion di e personanan den bus tabata di admira, tur tabata kier a yuda.
CLIENTE DI FAVI
Un cliente di FAVI, Tommy de Cuba, a participa specialmente n’e salida aki pa asina e por splica e otro miembronan con su persona por a sobrevivi 50 aña, tur caminda cu el a biaha, tur caminda cu el a bay y su so. Diabierna un biaha mas e ta haya pregunta con e ta sinti pa subi un bus, riba cual de Cuba a splica cu tur caminda cu el a biaha, el a subi bus tambe, manera entre otro na Hulanda, Alemania, Suecia, etc. y e experiencia di diabierna no tabata nada nobo p’e.
E diferencia ta cu na Aruba, e trapinan di e busnan ta mas halto y bo mester ta custuma pa move riba un trapi asina. Como cu e tin casi tres aña sin biaha, primeramente door di Covid-19 y cu e no a subi ningun bus, pa su persona e tabata algo diferente. E busnan cu a uza diabierna tabata busnan cu e no conoce, pa cual toch e experiencia ta keda, pa subi bus y busca caminda di sinta. Ora c’un persona ta ciego, t’e mes mester yuda su mes.
