E kurpa sin bida di Jarzinho Pieter, e keeper suplente di nos selekshon nashonal lo yega Kòrsou djaluna 21 di oktòber for di Haiti i ku tur probabilidat e entiero lo ta djarason 23 di oktòber. Esaki grupo “Amigunan di Pieter” ta hasi konosí. Esaki pa kita tur konfushon ku por tin ya ku inisialmente e defuntu lo a yega Kòrsou den weekend pa asina dera djaluna. Pero sirkumstansianan imprevisto a kambia e skema inisial. Lugá i horario di e entiero lo wòrdu anunsiá despues.
Grupo “Amigunan di Pieter” ta kòrda tur hende di bon kurason pa partisipá na e akshon pa krea un fondo pa e yunan di Pieter dor di kumpra e bunita T-shirt neonbèrde ku e number 22 riba dje. E T-shirt aki ta obtenibel na Mr&MS Exclusive pa 25 florin for di kua un parti substanshal ta bai na e fondo.
