Aruba sosteniendo Corsou pa guia barco gigante

E tugboat nobo di Aruba, “Colorado”, ta haciendo un trabou importante na Corsou. Ey a forma un ekipo di no menos di 5 tugboat pa dirigi e barco “Wugang Atlantic”, un barco masha grandi, cu a yega Corsou pa haci trabao di reparacion y mantencion den e dok di Damen.

Aruba Ports Authority ta masha orguyoso di e reconocimento internacional aki, den cual ta tene cuenta cu na Aruba nos tin ekipo moderno y sofistica, disponibel pa haci e tipo di trabounan asina pa companianan pafo di nos isla.

Wugang Atlantic ta un VLOC (Very Large Ore Carrier) di 330 meter largo, 57 meter hancho y cu ta pisa Gross tonnage (GRT) di 156,281. E barco a drenta waf di Corsou sin ningun problema via Santa Anna Baai ayera mainta. Wugang Atlantic (VLOC) lo permanece den Damen Shiprepair Curaçao pa algun trabou di mantencion y reparacion.

Na luna di april ultimo a inaugura “Colorado” den waf di Oranjestad. Riba e foto por mira gerencia di Aruba Ports Authority N.V. y Ministernan Oduber y Maduro.

Aruba Ports Authority ta contento di su ekipo profesional y experencia, cu por conduci un trabou asina, reconoci internacionalmente.

Na april ultimo APA a inaugura nan tugboat nobo “Damen Azimuth Stern Drive Tug 2811”. APA a conta cu sosten financiero for di AIB-Bank como agent bank cu a percura pa financia e tugboat door di un consorcio di 7 diferente instituto financiero.

A construi e tugboat “Colorado” na Vietnam, ta un barco di 28 meter largo y 11 meter hancho. A desaroy’e specialmente pa e tipo di lama di Caribe. E tugboat aki ta e prome den su estilo den henter Caribe, pues Aruba Ports Authority ta dispone di un tugboat ultra moderno, di e ultimo generacion. Ta un boto masha stabiel cu por ofrece mas y miho servicio.

Desde e aña aki Aruba Ports Authority N.V. ta bou liderazgo di Marc Figaroa. E tin un Master Degree den Business Administration y a specialisa den aviacion. Despues di a caba Colegio Arubano, el a sigui su estudionan na Daytona Beach, na Merca.

A funda Aruba Ports Authority N.V. na aña 1981 y ta responsabel pa construccion, maneho, mantencion y opera e waf di Oranjestad y di Barcadera, incluyendo tur propiedad, caretera y awanan rond di ambos waf. Tanto aspectonan di siguridad y mercadeo di turismo crucero tambe ta parti di e trabounan di APA. E operacion di stiwado na e waf di carga na Barcadera ta otorga na un compania priva.