Corte a bay di acuerdo cu un peticion di Aruba Birdlife Conservation cu a pidi pa anula un permiso duna pa construccion un beach y alabes a rechasa peticion di Natura (di Embassy) pa haya un aanlegvergunning.
For di e team legal di Embassy Suites por a compronde cu nan ta analisando e decision aki. Sigur ta cu nan lo apela e decision aki. Y na mesun momento lo studia ki otro opcion tin. Mas no kier a papia di e asunto awe.
Ironia di bida ta cu e decision aki a bini husto riba e mesun dia cu Gobierno a dicidi pa habri e sluisnan di e Planta di Purificacion di Awa na Bubali. E awa sushi (pupu) cu ta yega eynan a simplemente wordo manda pa lama. Contaminando e ambiente marino sigur. Y alabes causa un holo malisimo den henter e area.
Corte di Prome Instancia a dicta fayo den e apelacion cu Aruba Birdlife Conservation a haci contra Minister di Asuntonan General, Innovacion, Organisacion Gubernamental, Infrastructura y Ley Espacial y y Natura Development N.V. (doño di Embassy Suites). Den e decision aki Corte mester a evalua e decision di minister pa duna Natura un aanlegvergunning pa basha santo y crea un beach y pone dos jettie (cu ta kibra e olanan).
Dia 16 di juni, 2023, minister a otorga e aanlegvergunning. ABC a entrega obhecion y a pidi un decision temporal. Despues cu e minister a tuma un decision riba e obhecion di ABC, nan a apela. A trata ambos caso hunto dia prome di november ultimo.
Na final despues di analisa henter e Ruimte;ijk Ontwikkelingsplan met voorschriften (ROPV), Corte a conclui cu entre otro e construccion di e jettienan (pa kibra e olanan) ta en pugna cu reglanan di ROPV.
Pa loke ta e aanlegvergunning, Corte a bisa cu construccion di un beach no ta cay den e destinacion di un marinezone. E meta di marinezone ta pa mantene, recupera y desaroyo di e balornan den e zona ey. Construccion di un beach lo kibra e balornan aki.
Banda di esaki tin un seccion apart den ROPV pa beachnan. Pues den ley a haci distincion entre Marinezone y Strandzone.
ROPV mes no ta brinda posibilidad pa adapta e destinacion di marinezone pa beach, y tampoco pa un dispensacion of exoneracion pa construi un beach den e destinacion di Marinezone.
E decision di Corte ta pa hala aden e aanlegvergunning duna y rechasa e peticion di Natura pa haya un aanlegvergunning.
Pa un relato amplio lesa TREMPAN.
