Na aña 2012 a bini kambio den e "Burgelijk Wetboek 7A kaminda ta duna e mama
derechi pa duna su yu lechi na pechu bou di ora di trabou.

Pero awe na 2017 te ainda esaki no ta bon reglá. E lei ta bisa klaramente ku e mama tin, durante 9 luna largu, derechi pa duna su yu lechi na pechu bou di ora di trabou i ku mester tin un espasio adekuá p'e hasi esaki. Manda un mama duna su yu lechi na pechu òf "kolf" den baño, no ta aseptabel. Ta un lástima ku ainda tin doño di trabou ku no ta permití pa e mama duna su yu lechi na pechu bou di ora di trabou òf ta hasi difisil pa ku esaki. Mester bini un kambio den e pensamentu aki. For di un enkuesta ku e Parlamentario mes a hasi bou di 130 hende muhé, a sali na kla ku mitar (50%) no ta na altura mes ku tin un lei ku ta rehi dunamentu di yu lechi na pechu durante ora di trabou. Mas ku mitar di e hende muhénan ku a partisipa na e enkuesta aki a sigui duna nan yu lechi na pechu. For di e enkuesta aki a sali ku 60% di e mamanan no ta keda permití pa doño di trabou pa duna nan yu lechi na pechu bou di ora di trabou i 79.2% a indiká ku no tabata tin un espasio adekuá pa hasi esaki na trabou.

Dunamentu di lechi na pechu kombiná ku trabou mester keda mirá komo un asuntu di derechi di e hende muhé i komunidat kompletu mester kargé. E hende muhé mester por kombiná trabou i dunamentu di lechi na pechu sin diskriminashon òf desbentaha p’e. Mester perkurá pa tur hende muhé den tur ramo di trabou por disfrutá di e protekshon i derechi aki. P'esei Rozendal ta aploudī doñonan di trabou manera, RBC Bank, MCB, SEHOS i tambe UOC ku si ta tene kuenta ku e mama ku ke duna su yu lechi na pechu bou di ora di trabou!
Den e kuadro aki Parlamentario Elsa Rozendal a manda karta pa minister di Asuntonan Sosial, Labor i Bienestar, señor Hensley Koeiman, kaminda e ta hasi pregunta pa sa entre otro si ta kontrolá doñonan di trabou riba kumplimemtu di e lei aki, ki palabrashon tin ku doñonan di trabou i kiko ta hasiendo pa konsientisá mama i doño di trabou riba dunamentu di yu lechi na pechu bou di ora di trabou. Alabes e Parlamentario a manda karta pa Minister Konket di Maneho di Gobernashon, Planifikashon i Servisio Públiko pa sa si e ministerionan i entidatnan ku ta kai bou di Gobièrnu tambe ta kumpli ku e lei.

Comments

comments