E no tabata un eleccion facil, pasobra e candidatonan pa puesto den e sindicato a haya hopi sosten y e resultado tabata “cabes cabes” cu otro. Asina por ehempel e presidente nobo a gana cu 42 voto na fabor, mientras cu su contrincante tabatin 41 voto! Tabatin tres candidato cu a pone nan mes disponibel pa dirigi e sindicato di polis di Aruba (SPA), pero tabata Rodney Solognier, cu ta ocupando e puesto den forma interino na salida di Jose Dirksz, a haya sosten pa sigui na cabes di SPA.
E eleccion y conteo di voto a tuma luga na club di polis, POVA, situa na Barcadera. Un cantidad di polis a yega eynan pa ta testigo di e proceso democratico aki. Pero, a resulta cu e conteo di voto a bay cu bastante dolor di cabes y incertidumbre. Un di e retonan tabata cu e candidatonan por a postula nan mes pa mas di un puesto den directiva. Pero, e miembronan mester a vota pa un solo puesto pa cada candidato individual. Esun cu a vota pa e mesun candidato pero den mas di un puesto, a consider’e invalido. Esey a pone cu miembronan a disgusta y a manda yama Angelo Davelaar, ex-presidente di e sindicato pero actualmente no activo den polis, pa bin aclaria e procedura. Na final a dicidi cu ta conta tur voto toch.
Cu e realidad ey riba mesa, e eleccion a continua te den ora di marduga. E ora a bin anuncia e resultado final, den cual Rodney Solognier a resulta e ganado, aunke cu un bentaha limita. Na salida di e reunion, Clyde Burke, cu tabata e candidato cu a perde e puesto di presidente pa un solo voto a expresa na nos cu “nan tin miedo pa mi cambia Korps”. E di tres candidato tabata Mario Kock, cu a haya mas of menos mita di e votonan cu Solognier y Burke a logra compila riba nan nomber. Mester menciona cu a constata cu Clyde Burke a conta cu un sosten abrumador for di polisnan di San Nicolas en particular.
Eleccion pa directiva di SPA
Fo’i diaranson trempan caba casi 500 miembro di Sindicato di Polis Aruba (SPA) por a haci uzo di nan derecho pa eligi un directiva nobo. E proceso electoral a cuminsa 7:00 am y a caba 7:00pm. Por a vota na Warda di Polis na San Nicolas, na Shaba of tambe na POVA. Meta ta pa eligi miembronan pa ocupa e puesto di presidente, vice-presidente, secretario, tesorero como tambe comisario. Tur miembro di SPA por a haci uzo di nan derecho di voto.
Rodney Solognier, cu a bira presidente na juli 2021, na final di anochi a anuncia e resultado. El a comenta cu tabata un dia basta largo, pues ta despues di 12:00 am a caba cu e proceso di conteo di voto. Rodney, a gana e presidencia contra su contrincantenan Clyde Burke y Mario Kock. A haci algun conteo a traves di varios persona pa asina sigura cu tur cos a cana legalmente.
E acogida di votacion segun Solognier tabata “practicamente mescos cu e ultimo biaha”, riba 100 voto. Resultado entre e presidencia tabata basta cerca, segun por a compronde for di e presidente Rodney Solognier.
E prome decision
E directiva lo sigui cu locual nan ta bezig caba, pues eliminacion di e reduccion di 12.6% for di nan salario. Esaki ta un tema masha comenta den e ultimo dianan aki. Nan tin varios punto di agenda tambe cu lo introduci mas despues cu tempo. Un di nan cu sigur lo bira prioridad ta pa cambia e statutonan di e sindicato, pa por agilisa e proceso di tumamento di decision, pa por promove mas eficiencia y participacion directo di miembronan na momento di fiha posicion. E sindicato kier tambe pa reenforsa e posicion huridico di polis, pa nan por tin ley na nan banda den ehecucion di nan funcion.
E directiva saliente bou investigacion
Pero, problema semper tin. For di momento cu miembronan a manda e directiva interino cas algun siman pasa, a pidi e tesorero pa entrega e laptop di sindicato, debit card di banco y tur otro pertenencia di e organisacion. Sinembargo, el a nenga di haci esey, aunke a mand’e como tres carta registra. Riba dia di eleccion el a laga entrega e pertenencianan. Tambe el a informa e ora ey cu e directiva saliente ta bou di investigacion y cu e mes a entrega keho na Bureau Interne Zaken en Onderzoek (BIZO) di Cuerpo Policial Aruba. Kico a keho ta encera, contra ken e keho ta specificamente y ki delito e directiva bieu lo a comete, no ta conoci ainda. Hecho ta cu Junior Tromp mes tabata tesorero, pues tabata esun responsabel pa tur fondo cu ta drenta y sali for di e sindicato. Dicho funcion awor ta den man di polis Michelle Rasmijn.
Gratificacion pa sindicalista
Pa tin un funcion den directiva di sindicato di polis no ta pornada. Tampoco e tin un salario mara na dje, pero si algun beneficio. Ta haya oranan liber pa por atende cu asuntonan sindical, manera ta reunionnan interno den Cuerpo Policial mes, pero tambe reunionnan externo den cuadro di sindicatonan den union cu gobierno y otro partnernan. Pa esey a dicidi cu e miembronan di e directiva diario ta ricibi un compensacion di 400 florin pa luna mientras cu e comisarionan por conta riba un gratificacion di 300 florin mensual. “E no ta yega ni pa paga gasolin”, tabata por lo menos un di e comentarionan ricibi di un miembro den directiva.
Directiva nobo di SPA
E directiva nobo ta consisti di e siguiente personanan:
- Presidente: Rodney Solognier
- Vice-presidente: Rolando Maduro
- Secretario: Alejandro Pirela Soto
- Tesorero: Michelle Rasmijn
- Comisario:
- Francel Bernardus
- Mario Kock
- Jose Lacle
- Maiky Solognier
- Clyde Burke
E directiva a bisa nos un rato despues di nan eleccion, cu nan lo lucha pa e derecho y bienestar di tur polis. Por ultimo, Solognier a gradici tur cu a vota p’e pero tambe pa tur otro colega cu lo forma parti di e directiva nobo di SPA cu lo sinta pa un termino di dos aña.
Ken ta Rodney Solognier
Rodney Solognier a drenta Cuerpo Policial dia prome di maart 1995, pues a cumpli 26 aña como polis. El a crece den e trabou, te yega e rango di subinspector di polis y ta den funcion di Chef van Dienst den e districto di Santa Cruz. E funcion aki ta relativamente nobo y ta encera un version profesionalisa, adapta y cu amplio responsabilidad, compara cu locual antes tabata conoci como un wachtcommandant. Den e rol nobo, e polis den e funcion ey ta e hefe di tur e polisnan uniforma riba warda na e momento ey y tin autoridad di un subfiscal.
Tocante SPA
Sindicato di Polis Aruba ta existi desde aña 1986, ora Aruba a bira pais y nos a conta cu nos mesun cuerpo di polis. Prome cu esey Aruba tabata parti di Cuerpo Policial di Antias Hulandes y como tal e polisnan tabata miembro di e sindicato di polis di Antias, NAPB. E prome presidente di SPA tabata Isidro “Chido” Maduro, qepd. Otro polis cu a ocupa e puesto di presidente tabata Coizy Krozendijk, Victor Simon qepd, Eric Zaandam qepd, Miguel Maduro, Angelo Davelaar, Edgar Maduro, Jose Dirksz y awo Rodney Solognier.
