E sucedido cu e cacho Khaleesi, kende a fayece despues di a pasa di un periodo di maltrato, mara na cadena pa mas cu un luna, e persona responsabel a resulta di ta un politico di e partido MAS, lidera pa Marisol Tromp.
E partido despues di a tuma nota di e sucedido a tuma accion mesora y esaki ta loke cu Tromp a skirbi riba su Facebook. “Diamars 26 di maart Aruba a wordo sacudi pa e storia di Khaleesi, un cacho cu a muri a causa di negligencia y maltrato severo.
A bin resulta cu doño di e cacho ta Alberto Groeneveldt kende den eleccion 2021 tabata un candidato riba lista di partido MAS. Pa medio di e anuncio aki Partido MAS ta declara cu for di momento cu a tuma nota di e sucedido lamentabel aki, a tuma accion inmediatamente y a dicidi cu lo retira Alberto Groeneveldt for di Partido MAS.
Sr. Alberto Groeneveldt di su banda a dicidi di entrega su carta di retiro como candidato di MAS. Partido MAS ta rotundamente contra abuso y maltrato di bestia.” E cacho a keda mara pa mas cu un luna te ora cu denuncianan a yega na oido di Luna Foundation y su boluntarionan a bay tira bista pa libera e cacho aki, cu tabatin apenas un aña bieu y a pari algun puppie mara na un cadena cu a troce completamente den otro cu e no por a move mas.
Esaki a keda rasca su garganta y ora cu e boluntarionan a yega, su situacion tabata cos di yora. Lamentablemente dos dia despues el a fayece.
